Hello Arteta - Luis Enrique

Season hmasa Champions League semifinal-ah Arsenal leh Paris St-Germain an lo intawng tawh a, inkhel pahnihah PSG chak ve vein, final an lut - kumin final-ah team pahnih an intawng leh dawn ta.

PSG boss Luis Enrique chuan, "Mikelito Arteta hi ka ngaina a, kan naupan laiin team khatah kan khel dun ṭhin. Arsenal-ah hna ṭha tak a thawk a, a harsa dawn tih ka hria. Mahse, kan khelh dan phungah rinna ka nghat a ni," a ti.

Champions League final hi May 30, Inrinni zanah khelh a ni dawn. Enrique chuan, "Arsenal hi tun season-a team ṭha ber pawl an ni a, an hnathawh hi a ropui hle. Premier League champion thei an ni mek a, UCL final an lut bawk - ngaihnep chi a ni lo.

"Mahse, ka team chungah hian rinna ka nghat a ni," a ti a, Spanish coach hian a zawna Champions League nomawi chawi a tum ruh hle - team pahnih hi an league-ah ve ve hmahruaitu an ni mek a, UCL final-ah ropui zawk nih an inchuh dawn bawk e.