Tukin dar 7:45-ah Mizoram vs Madhya Pradesh

Swami Vivekananda U20 Men’s National Football Championship 2026-ah tukin zing dar 7:45 hian Mizoramin Madhya Pradesh an hmachhawn dawn. Coach Lalrindika Hmar kaihhruai Mizoram team hian match hmasa berah Arunachal Pradesh 7-0 in an sawp a, Madhya Pradesh lakah pawh chak turin inrintawkna an ngah khawp ang.

Madhya Pradesh hian match hmasa berah Uttar Pradesh lakah 4-0 in an tlawm. Mizoram coach Rindika Hmar chuan, "Madhya Pradesh hi an chhe lo a, Uttar Pradesh lakah chak lo mah se Arunachal Pradesh aiin an ṭha zawkin ka hria. Tharum an ngah a, kan fimkhur ve a ṭul ang," tiin Vanglaini a hrilh.

Mizoram coach chuan sawi zuiin, "Squad-ah hian player 18 chauh an awm a, kan player pakhat hi tangseh (chicken pox) vangin group stage-ah kan chhawr thei dawn lo. Kan squad a pan phah dawn a, chhuanlam atana hman erawh kan tum lo," a ti. Inelna hi Narainpur, Chhattisgarh-ah khelh a ni a, Mizoram hi finalist ni lai an ni a, nikum khan Delhi lakah an vanduai.