Shillong-ah Mizo club mualpho nawn

Indian Football League-ah Chanmari FC-in Inrinni zan khan Shillong Lajong an tlawh a, 4-0 in an chak lo. Mizo club midfielder pawimawh Joel Lalramengmawia chu minute 16-na lekah hnawhchhuah a ni a, Dipankur Sharma hote thian player 10-a khelh hi an tuar hle.

Lajong hian tun season-ah Mizo club vawi thum an hnehna a ni a, RG Stadium-ah Chanmari FC 2-1 a an hneh bakah Shillong-ah tun ṭuma Chanmari an sawp hma hian Aizawl FC 6-1 in an sawp tawh a ni.

Red card

Chanmari midfielder Joel-a'n minute lina lekah yellow card a chawi a, midfielder hmabak nei êng hian fimkhur phah nan hmang loin card la hmu lo ang rengin a la khel chhunzawm.

Minute 16-naah Hnathial tlangval Jakob Vanlalhlimpuia'n mual lai tan zawngin goal lamah a khalh lut a, Joel hian ball laksak tumin tlawh a, Chanmari midfielder hi a tlai hret avangin Lajong forward hi a tlawh thlu. Referee-in Joel hi yellow card vawi hnhna pein a hnawt chhuak.

Goal li maw

Lajong-ah hian Jakob leh Ephraim Lalremtluanga te an awm a, Birendra Thapa hnuaiah Shillong club hian game hmuhnawm an khel a, Chanmari lakah pawh an tam zawk hnu phei hi chuan an chungnung hle.

Mualneitu lamin an nawr na a, first half injury time-ah Abhay Gurung-a'n Chanmari defender Zothanpuia a bum hnuah Brazilian defender Marlon a bum leh a, goal mawi a khung. Second half-ah Chanmari defender Marlon hian siphurh sut theihna hun ṭha a bawhpelh a. Mizo club hian Lajong laka tlawm an duh loh avangin goal khung an tum a, a tlem zawk an nih avangin goal an chhuah tam phah.

Minute 70-naah Treimiki Lamurong-a'n goal mawi a khung a, keeper T. Mawia tan pawh dan nghaihna a awm lo. Everbrightson Sana Mylliempdah-a'n minute 78-naah Lajong goal thumna a khung a, Chanmari tlarhnung pherh vangah a ngaih theih.

Lajong an phur chhunzawm a, minute 87-naah Treimiki-a'n box pawn aṭangin goal ṭha a khung. Shillong club-in goal khung belh tumin an nawr zel a, keeper T. Mawia'n ṭha taka a dan avangin Mizo club-in goal an chhuah belh lo. Coach Birendra Thapa hote hian Chanmari laka hnehna an chan avangin champion beiseina an nei chhunzawm a, nizan lama Diamond Harbour leh Sreenidi Deccan inkhel result a zirin champion tum boruak a nung lehzual thei ang.