Mizoramin chakin bul an ṭan

Swami Vivekananda U20 Men’s National Football Championship 2026-ah Mizoramin nimin zing khan Arunachal Pradesh hmachhawnin bul an ṭan a, 7-0 in an chak. Coach Lalrindika Hmar kaihhruai Mizoram hian May 5, Thawhlehni zing dar 7:45 hian Madhya Pradesh an hmachhawn leh ang.

Inelna hi Narainpur, Chhattisgarh-ah neih a ni a, nikum khan coach Rindika hnuaiah Mizoram team-in final an lut a, Delhi lakah an vanduai. Kuminah champion ngei tumin an thawk chhuak a, Rindika hi manager F. Vanlaltleipuia leh assistant coach C. Lalnunmawia (Champhai Zotlang) te nen an thawk ho.

Mizoramin team-in training an nei ṭha a, ruahsur vanga ground a nal deuh nachungin goal sarih ngawt an khung a, khelh ṭhat ṭum ni se tun aia tam khung thei tur an la ni cheu. Mizoram tan Ramthar rawlthar Lalrinfela Ralte-in goal li a khung a, Zemabawk North rawlthar Henry Malsawmtluanga'n goal hnih a khung bakah Arunachal Pradesh goalkeeper Omallum Chikro-a'n an lamah a tilut bawk.

Mizoram coach Lalrindika chuan, "Inelna hi ground 1 leh 2-ah khelh a ni a, ground 2 kan chang. Ground hi natural a nia, a ground a ṭhat tawk loh bakah inkhelh hma zana ruah a sur ve nen a nal a, kan duh ang game kan khel thei lo. Chuti chung chuan, game kan thunun zawk a, hun ṭha bawhpelh tam lo ila, goal sarih aia ta khung thei kan ni. Inhliam kan nei lo a, 7-0 a kan chak chunga yellow card pahnih hmu kan awm erawh pawi ka ti," tiin Vanglaini a hrilh.