Ashley Young-a'n a chawl dawn

Ipswich Town defender Ashley Young chuan inkhelh a chawlhsan dawn tih a puang a, Inrinni zana Queens Park Rangers nen an inkhelh chu a career-a a match hnuhnung ber a nih theih thu instagram kaltlangin a sawi.

Young hian 2003 khan Watford-ah a career ṭanin, Aston Villa, Manchester United, Inter Milan leh Everton-ah te a khel kual tawh a, a career-ah club hrang hrang tan hian match 763 inlanin, goal 87 a khung tawh. November 2007 khan England tan inlan ṭanin, a ram tan vawi 39 a khel hman a goal sarih a khung bawk.

Man United tan Young hian Premier League, Europa League, FA Cup leh League Cup a chawi a, Inter tan Serie A title a la tawh bawk a, trophy chawi hnem lamah pawh a duai lo hle. Tun dinhmunah chuan Ipswich chu Premier League-ah hlankai a tum mek.

Kum 40 mi Young chuan, "Mipa naupang ka nih laia ka lo suangtuah ṭhin, zinkawng ropui tak chu ka zawh ta. Mahse, he zinkawng hian tawp chin a nei ngei tur a ni a, Inrinni hi ka professional career-a ka game hnuhnung ber a ni tawh hial mai thei. Kum 23 zet hnuah ka chawl dawn ta.

He thutlukna hi ka siam a la ngai dawn tih ka hria a, ka naupan ṭhat leh theih tawh loh bakah tun hnaiah ka taksain a tlin lo ṭan tawh. Inkhelh chawlhsan chungchang sawi mah ila tunah chuan Premier League-ah Ipswich chhohpui leh hi ka tum ber a ni," a ti.

Ipswich hian an match hnuhnung bera QPR an hneh chuan, playoff khelh ngai loin Premier League khel turin an tling dawn a, Young-a tan Tractor Boys (Ipswich sawina) thlahna duhthusam a ni ang.