Second leg-ah Hakimi khel dawn lo

Paris Saint Germain defender Achraf Hakimi chu, Thawhlehni zana Bayern Munich nen an inkhelh ṭuma a mal a tihnat avangin a chawlh a ngai dawn a, a chawlh chen tur hriat loh mah se kar leh Champions League second leg-a Bayern an hmachhawn hunah a tel ve thei dawn lo.

Morroco international Hakimi hi Bayern nen an inkhel hma aṭang tawhin a dinhmun a chiang lo a, April 25, Inrinni zana Angers an hnehna game-ah khan hliam tenau a neih avangin halftime-ah thlak a ni tawh a, mahse, Bayern lakah a inlan tho.

Bayern lakah Hakimi a khel ṭha a, Khvicha Kvaratskhelia goal khung tur pawh a siamsak hial. Mahse Hakimi hi hun tawp dawn lamah a inhliam avangin enkawl a ni a, PSG-in substitution an siam zawh hman tawh avangin a khel tluan ta tho.

PSG chuan thuchhuah siamin, "Hakimi hian Bayern lakah a malpui ding lamah hliam a tuar a, hun eng emaw chen chu enkawl a ni ang," an ti. Hakimi hliam vangin World Cup a khel dawn em? tih zawhna a tam nghal a, World Cup khelh nan kar ruk chauh a awm tawh avangin a mak lo.

Hakimi hi inkhel boruak sangah a ṭangkai a, season hmasa UCL final-a Inter Milan an sawp ṭum khan goal khung hmasa bertu a ni a, 2022 World Cup-a an ram semifinal a thlenpui khan game zawng zawng a khel kim vek bawk a, a chawlh rei a ngai dawn a nih chuan PSG leh Morocco tan chânna nasa tak a ni ang.