Miami GP ṭhulh leh mai thei

West Asia-a indona vanga thla khat chhung Formula 1 inelna chawlh a nih hnuah, Pathianni hian Miami Grand Prix ṭan a ni leh dawn a, mahse tun hnaiah ruah a sur nasat avangin ṭhulh leh a ni mai thei niin Miami GP huaihawttuten an sawi.

Florida nena hmehbel ṭhin ni sa tak kha tun hnaiah a awm mang lo a, ruah a sur nasa thei hle. 2025 season pawh ruah sur vangin buaina a lo awm tawh a, Charles Leclerc chu track-a tui a tlin vanga a tawlh hnuah bang a su a, hliam na tak tuar lo mah se a inbuatsaih chhunzawm thei lo. Sprint race hi track huh karah neih a nih avangin driver te tan a hlauhawm hle.

Race ni berah phei chuan ruah a sur nasa leh zual a, hemi avang hian F1 Academy race pawh ṭhulh a ni hial. Safety car hnungah formation lap vawi khat an tlanpui a, mahse driver ten khawhmuh an harsat bakah an tawlh nasat em avangin race hi tihtawp a ni. Mahse F1 Grand Prix khelh hunah erawh boruak a rawn ṭha chhuak a, tluang takin tlan niin Oscar Piastri chuan hnehna a chang.

Miami Grand Prix hi kum 2022-a Formula 1 calendar-a a tel ṭan atangin, a hmun dangdai avangin hriat hlawh berte zinga mi a ni der tawh. Miami hian intlansiakna hmuhnawm bakah khawvel khawpui ropui berte zinga mi a nih avangin khawvelin Miami GP a ngai hlu ṭhin.

Intlansiak a awm loh chhungin F1-in thuchhuah a siam a, rules thar hman tur a duang thar. Season laklawh laia thil thar duan a nih vawi khatna a nih avangin F1 ngainatuten Miami GP an ngaihven. May 2, Inrinni-ah Sprint qualifying hi neih hmasak a ni ang a, chumi hnuah Grand Prix Qualifying-in a chhunzawm dawn a ni.