Reaves-a'n Lakers chakpui zo lo

Los Angeles Lakers point guard Austin Reaves chu a hliam a dam tawh a, game 5-ah lo kir mah se a team a chakpui zo lo a, nimin zing khan 99-93 in Houston Rockets an hneh lo a, 3-2 in an hmahruaina tihzimin a awm.

Crypto.com Arena, Los Angeles-a inkhelah Lakers-in bul an ṭan ṭha zawk a, first quarter-ah 28-21 in hma an hruai a, Reaves a rawn kir bawk avangin an phur a, round 2 an kai mai a rinawm hman. Mahse second quarter-ah Rockets an tho chhuak a, point 30 zet score-in, 51-47 in Lakers hmahruaina chhuhsakin chawlhlawk an hmang.

Third quarter-ah pawh Rockets an nung zel a, 75-67 in hma an hruai chhunzawm. Fourth quarter-ah Lakers-in hma sawn hretin, point 28 score mah se Rockets-in point 23 an score bakah, quarter dangah an ngam loh avangin point rukin an chak zo lo.

Rockets tan Jabari Smith Jr-a'n point 22 neiin a score hnem ber a, ani bakah hian player paliin point 10 an score tling vek. Rockets tan player pariat chauh inlan mah se point score lo an awm lo a, chak an phu takzet.

Lakers tan veteran forward LeBron James-a'n point 25 leh assist pasarih a nei a, team khaipa ber a la ni. Austin Reaves pawhin point 22 a nei nghal a, hliam damkawr a ni tih a hriat loh. Mahse Lakers-in an vanduai ṭum an tawng a, a tlawm zawkah an ṭang.

Team pahihte hi May 2, Inrinni zing dar 7-ah an inhmachhawn leh dawn a, Lakers-in round 2 inhlangkai turin match khat chauh an mamawh tawh a, mahse pawhthlak theih an ni tih lantirin chetsual an ching a, thih leh dam karah Rockets an awm tawh avangin Lakers tan a awlsam dawn lo a, thi leh thau pawlha an khelh a ngai tawh ang.