Burnley leh Parker inṭhen

Burnley coach Scott Parker chuan an relegate hnuah, inhriatthiam tawnnain Burnley a chhuahsan a, Mike Jackson-a'n interim coach niin a thlak ang. Zirtawpnia Leeds nen an inkhelh aṭangin Jackson-a'n mawhphurhna a la ṭan ang.

Kar kalta khan Manchester City laka an tlawm avangin, Burnley hi Championship-ah an tla a, Parker leh club thuneitute an inbiak hnuah kum 45 mi Parker-a'n Turf Moor a chhuahsan.

Burnley chuan thuchhuah siamin, "Scott Parker chuan club nen inhriatthiam tawnnain, Burnley Football Club head coach aṭangin a bang a, min chhuahsan ta a ni. Club chuan Scott-a hnathawh dan te, a inpekna leh engkimah thinlung takin lawmthu kan hrilh a. Burnley nena inzawmna nei zawng zawngte chuan kan zahin lawmthu kan hrilh a ni," an ti.

Parker a chhuah rualin Burnley hian coach thar an melh nghal a, Wales coach Craig Bellamy hming a ri ring ber a, Burnley-in season thar atan an coach ni turin an duh a, mahse thuchhuah mumal a la awm lo thung.