Mudryk-a'n hremna a khing let

Chelsea winger Mykhailo Mudryk chuan FA-in, damdawi hman phal loh a hman avanga kum li an hremna chu a khinglet a, Court of Arbitration for Sport hnenah a hremna hlip turin ngenna a thlen tawh.

Ukraine international Mudryk hian October 2024-ah national team-a a khelh laiin, thawk lak tiawlsam thei leh chauh harna damdawi 'meldonium' a lo hmang tih hmuhchhuah a ni.

December 2024 khan suspend a ni phawt a, June 2025-ah thiam loh chantirin FA chuan kum li chhung hremna a lo pe tawh a, thla 18 chhung zet a inkhel tawh lo. Hetiang thila hremna an pek hian, an hrem ṭan hun aṭanga chhut ṭhin a nih avangin, Mudryk-a inkhelh leh hun tur hi December 2028 vel tura ngaih a ni.

Mahse, Switzerland-a Court of Arbitration for Sport (CAS) hnenah, Mudryk hremna an pek hi sut turin ngenna thehluh a ni a, season tharah a inkhel leh thei tawh mai thei nia sawi a awm bawk.

CAS chuan, "Mykhailo Mudryk-a'n FA laka ngenna a siam chu February 25, 2026 khan kan dawng a, kal leh zel dan tur ziakin kan inhrilh tawn mek. Thutlukna siam tura inbiakna neih hun tur erawh ruat a la ni lo," tiin an sawi.

Hrem a nih tirhin Mudryk chuan mak a tih thu a sawi a, tum reng vanga damdawi hman phal loh hmang emaw, dan bawhchhiatna engmah a neih loh thu a sawi bawk.

Mudryk hi Morgan Sports Law-in an buaipui mek a, he pawl hi Juventus-a Paul Pogba a khelh laia doping case-a lo pui tawh tute kha an ni a, boxer Tyson Fury leh cyclist Chris Froome-te pawh an lo buaipui tawh.

Kum 25 mi Mudryk hian kumin chhunga inkhelh leh hman ngei a tum a, Uxbridge FC-ah private coach leh goalkeeper ruaiin training a nei reng a, a taksa tih fit a tum hle.

Hetihlai hian Chelsea chuan he thil hi a tawp thleng an nghah dawn avangin engmah sawi an duh rih lo a, FA pawhin he case hi a la kal lai a nih avangin thuchhuah an nei thei rih lo a ni.

Mudryk hian January 2023 khan pound maktaduai 61-in, Chelsea hi Shakhtar Donetsk aṭangin a zawm a, inelna hrang hrangah match 73 khelhsak tawhin, goal 10 a khung tawh.

Mudyrk hi khatihlai khan Arsenal pawhin lak an duh a, mahse Chelsea zawm a thlang zawk. Hei hian theihna sang tak a nei tih a lantir a, mahse, a theihna tak tak a phochhuah hmain hrem a tawk a, November 2024 hnuah a inkhel leh tawh lo.