Silly Point: Nipui leh Cricket

BCCI hnuaia hmasawnna ṭhahnem tak zingah tun Thawhlehni liam ta khan India prime minister Narendra Modi-a'n Cricket Association of Mizoram hnuaia Indoor Cricket Academy chu Sihmuiah an hawng ta a. Cricket lama tui Zofate tan hmasawnna nasa taka thlen tu ni mawlh teh se.

IPL lamtluang

Thil reng reng hi ngaiawh theih a ni lo a. Cricket atchilhna India ramah pawh hian tun season hnih thum hi chu IPL hi mipui lamah hian a hlutna leh an buaipui uchuak ang kha a tlahniam deuha ngaih a ni. Zan tin mai inkhel, batting awl lutuk leh star player tam tawh lohna tih te hi a chhuanlam an mawhpuh zinga mi a ni a. Stadium ṭhenkhat seat khat zo ta lo te, tv lama entu tlahniam ve deuh hi, tun aia European Sports league anga kar khat chhunga inkhel tlem zawka BCCI-in a rem theih chuan, a ziaawm leh mai ka ring.

A ruh no ho

IPL tih hming leh inhmeh tlat club pathum te chu Chennai Super Kings, Mumbai Indians leh Kolkata Knight Riders te an ni a. A ni lah taka ṭum 18 lai IPL an huaihawt tawhah heng club pathumte hi ṭum 13 ngawt an champion tawh te an ni. Mahse kumin 2026 IPL season chanve thleng hi chuan, team nawi ber pathum zinga mi an ni ti ila mi huatthu kan sawi lo turah ngai ang.

A chhan

KKR ten IPL history-a player manto ber cheng vaibelchhe 25 man Cameron Green-a'n duh dan angin an chhawr thei lo a. Chu ai mah chuan an top order che fuh hleithei lo leh khawvel batsman-ten Varun Chakravarthy-a ball khelh dan an thiam tawh vang a ni ber.

Mumbai Indians lah an captain Hardik Pandya leh innghahna Jasprit Bumrah te form tlakhniam lai an nan bakah an middle order te chet fuh hleitheih loh avangin table-ah a mawngphahah an awm hrih phah ti mai ang. CSK tan coach Stephen Fleming leh MS Dhoni te era-in mual an liam a hun tawh tih a chiang. An batsman-te che ṭha lo chu thudang, death over-a run 17 average an neih tlat hi chuan, champion lo tur ziaah an dah theih ang.

Engpawh nise, IPL-te chu khelh dan kan thiam a lawm tia, a changtupa hnar a thi ve ṭan chauh a ni ti tur ni se, heng franchise pathum baka insawithei tur an awm chuang lo a. Mahse inkhel round ruk chiah awm tawhna group stage hi an rawn paltlang dawn a nih ngai chuan, phengphehlep khua a tlai hmain an chak vek a ngai tawh ang.