Comeback ropui lantirtu Aizawl FC

Indian Football League-ah Aizawl FC-in relegation round-a an match hmasa berah Namdhari Sports Club lakah goal chhuah hmasa mah se R. Lalruatfela hoten hnehna an chang tho. Mizo club tan Khawbel tlangval Zomuansanga'n minute 78-naah chakna goal a khung.

Relegation round hi Deccan Arena, Hyderabad-ah khelh a ni a, first half-ah team pahnih an intluk tawk hle. Punjab club-in minute 43-naah an khung a, dinglam aṭanga Bhupinder Singh cross chu Aizawl FC defender Timur Talipov-a'n an lamah an tilut.

Second half-ah Aizawl FC-in an nawr na a, Laltlanzova cross ṭha chu K. Vanlalhriatzuala'n ṭha takin tauh mah se keeper Niraj Kumar-a'n a dansak. Minute 67-naah AFC an vannei a, Sawma Tlangte-in dinglamah mawi zeta defender a bum hnuah a lalut a, a cross ṭha tak chu Zomuana'n khung thei lo mah se Kamalpreet Singh-a'n an lamah a tilut.

Coach R-a hoten an nawr chhunzawm a, vei lam aṭanga Zozoa cross chu Zomuana'n box chhunga rilru fim takin a la a, goal kilah tak a pet lut. Minute 78-naah 2-1 a ni a, Mizo club-in goal chhuah belh loin point thum hlu tak an hlawh chhuak. Kolasib tlangval R-a chuan, "Relegate lo turin theihtawp kan chhuah a, field chhung leh pawnah pawh thil chi hrang hrang team boruak siam ṭha thei tur kan ti nasa, chu chu zanin khan a lang a, nuam ti takin kan game ṭha kan khel chhuak leh thei a ni," tiin Vanglaini a hrilh.

Aizawl FC coach F. Lalrinmawia chuan, "Season bul kan ṭan ṭha a, match hmasa pathumah kha chuan tihsual hi kan nei meuh lo. Match lina aṭangin tihsual a tam chho a, video kan analyse nasa a, kan inzir nasa chungin kan insiamṭha thei meuh lo. Khualmuala kan chet chhiat avangin relegation round khelh a ngai a, team boruak pawh a hniam phah. Heti taka kan che chhe chung hian club neitu Robert Romawia Royte te chhungkua bakah Sporting Director leh club hotu dangin kan khel ṭha lo chungin in ban zawng leh a thim zawngin rilru an pu lo. Kan chungah rinna an nghat a, Mizo football tana Aizawl FC hlutna kan hria a, relegate lo turin theihtawp kan chhuah ang," tiin Vanglaini a hrilh a, a hmun ngeia ṭawiawmtu Hyderabad-a Mizo awmte chungah lawmthu a sawi bawk.