Mainoo-a'n kum 2031 thleng contract pawtsei

Manchester United midfielder Kobbie Mainoo contract neih lai chu kum 2027-a tawp tur a ni a, nimin khan kum 2031 thleng atan contract neihlai hi a pawtsei a, kum khat dang pawhsei theih dan a la awm bawk.

Kum 21 mi Mainoo hi Ruben Amorim hnuaiah khelhna hmun a chan tam loh avangin Old Trafford chhuahsan a duh a, nipui bazarah chhuah an phalsak lo a, thlasik bazarah pawh chhuak tura sawi ni mah se Michael Carrick hnuaiah khelhna hmun a chan chhoh avangin cham a thlang ta zawk.

Carrick hnuaiah Mainoo-a'n hmun pawimawh a chang a, league 12 aṭangin match khat chiah a khel lo a, inhliam vangin Leeds United a hmachhawn thei lo a, 2-1 in an chak lo.

Mainoo chuan, "Manchester United hi ka tan chuan ka in ang a ni a, kei leh ka chhungte tan a hlu em em a ni. Kum ruk ka nih aṭangin United academy-a training hmasa ber ka nei a, he club ngeia hlawhtlinna chan hi ka duh a ni," tiin a sawi.