Salem ngamtu Kulikawn, 5 star BVT

MBOCWWB 8th Inter Village Football Tournament 2026-ah Kulikawnin team ṭha zinga mi Salem Veng 1-0 in an hneh a, inkhel dangah Bethlehem Vengthlangin harsatna nei loin Bawngkawn West 5-1 in an sawp bawk.

5 star BVT

Nimin inkhel hmasa zawkah BVT-in goal an khung hma a, AIFF Elite Academy chhuak K. Lalramzauva'n minute lina lekah box pawn aṭangin kawh zetin a pet lut. BVT an vannei zui a, Lallawmzuala ball pet chu Bawngkawn West keeper-in an lamah a tilut.

Bawngkawn West tlarhnung tihsual vangin RZ-a'n minute 36-naah a khung leh a, halftime-ah 3-0 a nih avangin BVT tan hna harsa tur a awm tawh lo. Second half-ah BVT fimkhur loh vangin penalty an chawi a, Lalvenchhunga'n minute 79-naah a khung.

Goal chhuah vangin BVT an buai phah lo a, injury time-ah Rammawia'n offside trap bumin a pet goal a, hun tawp hma chiahin BVT captain hian Lawmzuala cross chu goal-ah a chantir leh bawk.

Hei le, Kulikawn

Salem Vengin champion tumin inelna an hmachhawn a, beiseina sang tak nei mah se team langsar ni pha lo Kulikawn lakah an chak lo. First half-a goal a luh loh hnuin minute 63-naah goal awmchhun a lut a, goal mawi bik a ni.

Mual dinglamah Aldrin-a'n ṭha taka a lakluh hnuah a cross a, captain Hriata'n a kap karah luhtirin (dummy) Andrew Lalchhanchhuaha'n kawh zetin a pet a, goal ban a per hnuah Salem Veng keeper Lalhmachhuana hnung fuhin goal-ah a lut.

Salem Veng lam hian siphurh sut tumin nawr viau mah se goal hmaah an hriam tawk lo a, Kulikawn tlarhnung an paltlang thei lo. Injury time minute nga pek belh a ni a, Lalnunzira leh David Lalchhuanawma te telna Salem Vengin an hmang ṭangkai thei lo