Sawi hlawh Eze penalty chu!

Atletico Madrid leh Arsenal 1-1 a an inhnehtawk laiin, Gunners-in penalty an hmuh belhah an inngai a, an phur hman hle. David Hancko chuan bench aṭanga luhtir Eberechi Eze-a ke a tawk fuh a, Eze hi uar takin a tlu.

Referee Danny Makkelie-a'n penalty spot a kawk a, mahse, video assistant referee (VAR) a rawn hnuah Makkelie hian khelmual sira monitor a en zui a, a penalty pek tawh chu a sut leh ta daih!

Arsenal boss Mikel Arteta chuan, "Kan game a thlak danglam ta vek a, hetiang ang level-ah chuan khatiang kha thleng lo tur a ni.

"Referee khan thutlukna a sut chhan min hrilh lo a, vawi 13 vel a ennawn a ni lawm ni? Chu aia chiang enge awm chuang?" a ti a, an penalty hmuh tawh sut a ni chu a lawm lo hle.

Arsenal hian tun season Champions League-ah vek, hetiang deuh chiah hian penalty an lo hmu tawh. Round of 16-a Bayer Leverkusen nen an intawn ṭumin, Malik Tillman chuan Noni Madueke a titlu a, penalty a chawi.

Hemi ṭum pawh hian Tillman-a'n Madueke a tawk ngei a, mahse, a na tawk lo. Khelmualah referee-in penalty pe lo ta se, dem theih a ni lo ang. Mahse, a pe miau a, VAR-ah a ennawn zui.

Dan ang chuan, VAR-a a en hian, 'contact' a awm miau avangin penalty tur a ni, tih a ni a, kaltlangpui a ni. Atletico nena an inkhelh pawh khan 'contact' a awm ngei a, Eze erawh a tlu uar hret tih phat rual a ni lo.

Mahse, Hancko-a'n Eze a rah fuh miau avangin, monitor-ah a thlir a nih chuan penalty kha pek tlang tur ni awm tak a ni. Mahse, inkhel thununtu berin penalty ni leh loah a ngai a, Arsenal an vanduai.