Atletico penalty ve thung kha?

Tun ṭum UCL semifinal pahnihah sawisel theih takin penalty hmuh tur a awm ve ve. Paris St-Germain leh Bayern Munich inkhela PSG penalty hmuh pawhin sawi zui a hlawh a, penalty lo tura ngai an tam zawk.

PSG leh Bayern inkhelah khan, Ousmane Dembélé-a ball cross tur chu Alphonso Davies-a'n a lo dang - ball hian Davies-a malpui per phawtin, a kut a per leh zui.

Referee Sandro Scharer-a'n a tirah penalty pe lo mah se, khelmual sirah a ennawn a, penalty a pe zui. Hetah hian referee-in a tisual a, penalty pek tur a ni lo.

A chhan langsar takah chuan, Davies khan a kut a phar chhuak lo a, a nih tur angin a awm. Ball kal dan avangin a kut a tidanglam lo a, ball-in a per hnuah a taksa herin, chu chuan a kut a fuh tel ta chauh zawk.

Mahse, referee berin a pe miau a, sawi theih a ni tawh lo. A nih leh, Arsenal penalty chawiah khan, Marcos Llorente-a 'shot' khan Ben White-a taksa a per phawt a, a kut a per leh a, penalty tur tho a ni em? tih zawhna a lo piang ta chiah.

A chhanna erawh, "Aw, ni e," tih a ni. "Davies-a penalty chawi kha referee-in a tisual a nih chuan, eng tin nge White-a handball kha penalty a nih bik?" tih hi zawhna a awm leh thei bawk.

UEFA-in a hrilhfiahna aṭanga thlir chuan, Ben White khan, ball-in a taksa a per hma daih tawh khan a kut a phar chhuak a, a taksa leh a kut a inhlat hret tawh tih a ni - chuti a nih chuan referee-in penalty a pe kha a dik thlap.

Mahse, Liverpool captain hlui Steven Gerrard chuan, "Referee kha Davies-a chunga thil thleng khan a rilru a luah mah mah niin a lang a, penalty pek ngei turah a ngai nghal tawp a ni," a ti a, a sawisel.

Hetihlai hian Match of the Day pundit Stephen Warnock chuan, "Premier League-ah chuan ni se, penalty a ni lo ang," a ti ve thung - a sawitu pahnih hi English ve ve an ni tih erawh theihnghilh lo la.