Jamshedpur khelmualah FC Goa

Indian Super League-ah Nilaini leh Ningani zan khan match a awm lo a, zaninah erawh a awm dawn thung - champion beisei team pahnih an intum dawn a, zan dar 7:30-ah Jamshedpur chuan FC Goa an mikhual ang.

Jamshedpur hi an league match hmasa paliah chak vek mah se, match nga zet a zawnin an chak lo zui a, an hniam hman viau. Mahse, an match hnuhnung berah Chennaiyin chu 4-1 a sawpin beiseina an nei thar ve leh a, champion tur erawhin tlawm a thiang tawh lo.

Men of Steel hian match 10-ah point 18 hmuin, hmahruaitu Mohun Bagan chu point hnih chiahin an phak lo - match khatin an khel tam thung.

Bolton Wanderers boss hlui Owen Coyle-a enkawl team-ah hian Mark Zothanpuia leh Lalhriatpuia Chawngthute chu player pawimawh an ni a, zaninah pawh inlan leh tura beisei an ni.

Hetihlai hian FC Goa hi beisei anga season bul ṭan lo, match thum a zawna chak leh tawh an ni thung a, he team-ah hian Ayush Chhetri chuan hmun pawimawh changin, Daniel Lalhlimpuia kan hmu ṭhin bawk - anni bakah hian Jerry Lalrinzuala leh Malsawmtluanga te an awm bawk.

Goan club hian point khat chauhin hmahruaitu Bagan an phak lo tawh a, mahse, match khatin an khel tam - match thum chiah khelh tur an neih tawh avangin, champion an tum chuan tlawm a thiang tawh lo.