Kane, Olise & Diaz

Bayern Munich-in Harry Kane an nei a, English striker ropui hi Tottenham Hotspur-ah khan cham rei hret lo se chuan, hei ai hian a chanchin kan sawi nasa zawk ang - club langsar a zawm meuh chuan, 'Harry Kane' kan ti ta deuh reng a nih hi!

Kum 32 mi striker hian tun season inelna hrang hrangah match 45 khel tawhin, goal 53 a khung a, assist vawi ruk a nei tel. Kane hian UCL bikah match 11 khelin, goal 12 a khung bawk a, PSG hian chak an duh chuan Kane ven dan a ngaihtuah a ṭul dawn.

Mahse, Kane dah ṭhat chauh a tawk lo ang. Kum 24 mi Michael Olise hi Bayern a pan hnuah a thiam tawlh tawlh em ni chu aw, tih tur a ni a, tun season-ah match 46 khela goal 19 khungin, assist vawi 29 a nei tawh.

Liverpool fan-ten Luis Diaz an chhuahtir pawizia an sawi bang thei lo. Colombian forward hian match 45-ah goal 25 khung tawhin, assist vawi 20 a nei tel a, awm lo ata awma siam thei player tih hian a thiamzia a hrilhfiah ber.

Bayern hian hliam vangin Serge Gnabry chhawr thei dawn lo mah se, Jamal Musiala a la awm tho a, lungngaihna tur a awm lo - he team hian semifinal aṭangin Real Madrid an pet chhuak tih theihnghilh suh.