Kan la duhkhawp lo - Luis Enrique

Paris St-Germain boss Luis Enrique chuan, "Season hmasa kha chuan team naupang tak kan nih avangin tuman champion turin min ring lo. Mahse, tunah chuan champion team kan ni tih mi zawng zawngin an hre ta.

"Hetah hian kan duhkhawp ta tihna erawh a ni lo a, hmasawn zel kan la ngai a, chu chu kan tum ber pawh a ni," a ti - nomawi pathum season khata an chawi hnuah pawh hmasawn an mamawh thu a la sawi cheu.

Enrique sawi angin PSG hi team naupang tak ni mah se, khelmualah erawh eng team mahin an hmachhawn châk lo. Bayern-in Harry Kane an nei a nih chuan Ousmane Dembele an nei ve tho.

Ballon d'Or kawltu hian tun season-ah hliam vangin match 34 chauh khel mah se, goal 16 leh assist pakua a nei a, a thiam ngaiin a la thiam reng - a awih lo tan Liverpool tlarhnung lam zawh theih an ni ang!

Khvicha Kvaratskhelia hian Dembele angin ngaihven hlawh tawk lo mah se, a thiamna erawh sawi bo theih a ni chuang lo. Tun season-ah match 46 khela goal 16 khungin, assist vawi kua a nei tawh.

Desire Doue pawh hian match 35-ah goal 12 leh assist vawi sarih a nei a, a hmuhnawm ṭhin hle. PSG tlarhma pathum dang turin Bayern Munich tlarhnung an awm a, tawnhriat nei ṭha Manuel Neuer hmaah Dayot Upamecano leh Jonathan Tah te an din dawn avangin PSG tan a awlsam dawn lo.

Bayern hian Kylian Mbappe leh Vinicius Jr neitu Real Madrid an dang thei a, PSG tlarhma hmuhnawm tak hi an dan theih loh chhan tur an hre lo ang.