Chanmari tan Diamond Harbour an ṭha hret

Indian Football League-ah Chanmari FC-in Inrinni zan khan hmahruaitu Diamond Harbour an mikhual a, Mizo club hi khel ṭha mah se Kolkata club-te goal hmaah an hriam hret. Spanish manager Kibu Vicuna hote tan Antonio Moyano leh Mizo tlangval R. Ramdinthara ten goal an khung.

Diamond Harbour hian match 10 aṭangin point 25 an hmu a, pakhatna dinhmun sawhnghet chhoin season thara Indian Super League khel turin an dinhmun a ṭha. Chutihrualin Zirtawpni zan inkhelah Sreenidi Deccan-in Rajasthan United an hneh a, Hyderabad club leh nizan lama inkhel Shillong Lajong te chu Kolkata club tan an la hnawksak thei ang.

Moyano show

Chanmari leh Diamond Harbour te an inkhel tawk a, chance ngah lamah pawh an inthlau lo. Mahse, Kolkata club-in Antonio Moyano an nei a, Spanish midfielder inkhela danglamna thlentu a ni. Minute 34-naah Moyano hian Chanmari winger Jota ball chan lai chhuhsakin ṭha taka a khalh luh hnuah kawh zetin goal ban perin a pet lut.

Moyano hian hemi hma pawh hian chance ṭha a insiam a, Chanmari keeper Zothanmawia'n ṭha takin a dang. Keeper T. Mawia dan per hi Paul Ramfangzauva'n a club hlui lamah a khung teuh hle. Chanmari tan Lalruatsanga leh KC Malsawmsanga ten chance ṭha an hlah ve bawk.

Second half-ah pawh Moyano a langsar a, goal erawh a khung tawh lo. Chanmari lamin substitution an siam fuh tawk lo a, right back-a khel Zothanpuia (Thangpuia) an thlak hnuah right back-a khelh nghet an nei lo. Diamond Harbour-in hmunruak hi rawn hmu fuhin minute 87-naah Bryce Miranda cross chu subtitute Tharpuia'n goal kilah tak a tauh lut a, Kolkata club 2-0 in an chak.

Engtin zel?

IFL-ah hian stage hnih a awm a, Championship stage-ah hian vawi khat an inkhelh kual chhuaha sang parukte an awm. Team tin hian stage 1-a an point hmuh an chhawm vek a, vawi khat ṭheuh an inkhel chhuak dawn.

Table chunglama awm pathumin an mualah match thum an khel ang a, khualmualah match hnih an khel ang. Chanmari erawhin panganaa stage 1 an khar avangin an mualah match hnih chauh an khel dawn a, May 9, Inrinni zan hian Dempo SC an mikhual leh ang. Hemi hma hian Mizo club hian Shillong Lajong an tlawh dawn a; May 2, Inrinni hian Shillong-ah NorthEast Derby khelh a ni ang.