League One khel tur Leicester!

Premier League nomawi an chawi aṭanga kum 10-naah chiah Leicester City chu League One-ah an tla thla a, season hmasa lawka Premier League kheltu Foxes hian season tharah chuan English third division-ah inelna an hmachhawn dawn tihna a ni.

Foxes hian Thawhlehni zan khan Premier League-a kir tum Hull City chu mikhualin, 2-2 in an inhnehtawk a, match hnih khelh tur la nei mah se, relegation zone an chhuahsan theih tawh loh avangin an tla.

King Power Stadium-a inkhelah Hull hian Liam Millar hmangin goal hmahruai an khung a, Foxes-in Jordan James (penalty) leh Luke Thomas hmangin an chhanglet. Mahse, Hull tan Oliver McBurnie-a'n a khung ve leh a, Foxes an tho leh tawh lo.

Leicester hian tun season-ah coach pathum an nei hman a, January khan Martí Cifuentes banin, Andy King chu coach lailawk atan an ruat a, February aṭang khan Gary Rowett chuan enkawl lehin, a chhanhim zo ta chuang lo a ni.

Foxes hi Premier League leh Championship aṭangin, season zawnin an relegate tihna a ni. Championship-ah hian club 24 inelin, season khatah match 46 khelh ṭhin a ni a, Foxes hi match hnih khelh tur la nei chungin an tla.