Napoli-in McTominay thlun ngheh tum

Serie A club Napoli chuan an midfielder Scott McTominay chu contract thar ziahpui an tum a, McTominay hian a contract a pawt sei a nih chuan 2030 thleng a cham ang a, kum khatah pound makataduai 2.6 a hlawh dawn.

Scottish midfielder hian Manchester United aṭanga Napoli a pan hnuah hma a sawn a, an innghahna ber pakhat niin season liam ta khan Serie A title a lakpui a, Serie A MVP-ah thlan a ni nghe nghe. Tun season-ah McTominay a che ṭha chhunzawm a, hliamin tlakbuak mah se inelna hrang hrangah, match 38 khel tawhin goal 12 a khung tawh a, assist pali a nei tawh bawk.

Kum 29 mi McTominay hi a club hlui, Man United-in lak let an duh tih thawm a awm bawk a, hetiang karah hian Napoli chuan an midfielder hi hun rei zawk cham tura thlun ngheh an duh. Khawvela midfielder ṭha ber zinga chhiar tel tawh, McTominay hi Manchester City midfielder hlui Kevin De Bruyne nen an inkawp zel dawnin a lang.

Tun season-ah Antonio Conte naute hi hliam vangin an buai a, January thleng khan champion beisei mah se, player hliam an ngah avangin an result-in a tuar a, Champions League leh Coppa Italia aṭanga an tlak bakah league-ah an tlahniam a, tun hnaiah rawn harh thar mah se, match ruk chiah khelh tur a awm tawh avangin champion a har tawh dawn.

Napoli hian zanin dar 9:30-ah Lazio an mikhual dawn a, panganaa awm Como nen point riat chiaha an inthlauh avangin, an dinhmun a la him bik lo. Season tharah Champions League khelh an tum a nih chuan chetsual a thiang tawh lo.