Arsenal keeper hlui Manninger a thi

Arsenal leh Juventus goalkeeper hlui Alex Manninger chu Austria-a Salzburg khawpuiah relin a sut avangin Ningani chhun dar 11:50 khan kum 48 mi niin a thi.

Salzburg police-te sawi danin, Manninger hi a mah chauha lirthei chhunga a awm laiin relin a su a, lirthei chhung aṭanga lak chhuah a nih hnuah damdawi-inah hruai a ni a, mahse an chhan hman ta lo. Police te chuan rel khalhtu erawhin hliam a tuar lo tih an sawi bawk.

Austria Football Association chuan, "Manninger hi Austria tan field chhung leh pawnah football ambassador ṭha tak a ni a, a thiamna leh a thawhrimna zawng zawngte kha a khelh tawhna club leh ram tan a ṭangkai takzet. A hlawhtlinna chan tawhah zahna sang ber kan hlan a, kan theihnghilh tawh ngai lo ang," tiin an thuchhuah an siam.

Manninger hian an ram club Red Bull Salzburg-ah a career-a ṭan a, Europe club 14 tan khel hmanin; Arsenal, Juventus, Udinese leh Augsburg te chu a langsar zualte an ni. Arsenal tan 1997-2002 khan khelin, David Seaman-a thachhang dawltu a ni ṭhin. Premier League leh FA Cup nomawi a chawiin, ram tan vawi 33 a inlan hman bawk.

Kum 2016 khan kum 39 mi niin Liverpool-ah contract a ziak hman a, mahse vawi khat mah a khelhsak hman lo thung.