Bayern champion zan a ni dawn em?

German club hlun Borussia Dortmund chuan zanin dar 7:00 hian Hoffenheim an lenchilh dawn a, hmahruaitu Bayern Munich-in Pathianni zan dar 9:00-ah Stuttgart an mikhual ve dawn thung. Bayern-in an kut vei lamin league title an dawm tawhah a ngaih theih a, zaninah Dortmund-in point an hloh a nih chuan Bayern um phak ngaihna a awm tawh dawn lo a, Bayern champion zan a ni thei.

January thlaah Bayern an chesual a, 2-1 in Augsburg an hneh lo a, tun season-a a vawi khat nan an tlawm. An match dawt lehah Hamburg an inhnehtawkpui leh nghal a, Dortmund nen point ruk chauhin an inthlau hman. Mahse a umtu Dortmund an chetsual ngun zawk a, Bayern an tawlhthluk duh tawh loh avangin, match nga khelh tur la awmah point 12 zetin an inthlau tawh.

Bayern hi Real Madrid hneha Champions League semifinal lut hlim an ni a, an phur vanglai tak an ni. Bavarians hi DFB-Pokal-ah semifinal an lut tawh bawk a, treble champion thei dinhmunah an ding. April 22, Nilaini hian German Cup semifinal-ah an Bayer Leverkusen nen an inkhelh leh nghal dawn avangin, zaninah Vincent Kompany-a'n a player te a hahdamna hun a siamsak a nih pawhin a mak lo ang.

Hetihlai hian Dortmund erawh Bundesliga-ah bak nomawi an beisei tur an nei tawh lo a, chu pawh an kutah a innghat tawh lo a, Bayern an chetsual tel a ngai tawh. Chutihrualin an hmachhawn tur Hoffenheim hi an talbuai lai a ni am, match hnuhnung pangaah vawi khat chiah an chak a, Dortmund hi rinkai zawk an ni tho. Bayern champion nomawi chhuhsak tumin theihtawp an chhuah dawn a, an champion thei ta lo a nih pawhin Bayern champion hun sawn hlatsak tal an tum ang.