Fiorentina an sang zel

Serie A club Fiorentina chuan Thawhṭanni zan khan 1-0 in an mikhual Lazio an hneh a, Robin Gosens-a'n goal awmchhun a khung. Point 35 hmuin 15-naah an chho a, relegation zone-a awm Leece aiin point riatin an ang zawk.

Tun season-ah Fiorentina-in beisei an phak lo a, tlak hlauhawmah awmin an dinhmun a him lo hman. Thawṭanni zanah pawh chak tura rinkai loh zawk an ni a, Lazio-in inkhel an thunun bakah chance an nei hnem zawk.

Mahse, Fioretina-in a pawimawh ber goal an khung a, minute 28-naah Leeds United leh Everton forward hlui Jack Harrison-a cross chu Gosens-a'n a tauh lut a, a team chakpui nan a tawk.

Lazio-in goal khung ngei tumin an nawr a, mahse Fiorentina keeper David De Gea an paltlang thei lo. Manchester United keeper hlui De Gea hian goal-a lut tur vawi tam a dang a, Fiorentina chak nan goal khungtu tluk zetin a pawimawh.

Fiorentina hi an match hnuhnung pangaah chak loh an nei lo a, Serie A-a inhmantang turin kawng dik an zawh zel. Fiorentina hi Conference League-ah an la dam a, champion an tum a, Serie A-ah inhamtan an tum bawk a nih chuan, thi leh thau pawlha an ṭan khawng a ngai tawh dawn.