Europe-a inlan tum Getafe chak lo

Thawhṭanni zan La Liga inkhelah, Getafe chu an mikhualna ramah 1-0 in Levante laka an chak lo a, an chung chiaha awm Real Sociedad lehpelh theihna hun ṭha an bawhpelh.

Ciutat de València-a inkhelah mualneitu Levante an chungnung zawk a, mahse team pahnihte goal-ah an hriam tawk loh avangin goal a lut lawk lo.

Levante an vanduai a, first half-a Carlos Espi-a goal an pawm loh bakah, minute 70-naah an penalty hmuh chu Adrián de la Fuente-a'n a hlah bawk a, awlsam takin Getafe keeper David Soria-a'n a mansak.

Mualneitu team an vanduai reng lo a, minute 83-naah Manu Sánchez-a cross chu Espi-a'n a tauh lut a, Levante chak nan a tawk. Getafe defender ten Espi an veng ṭha tawk lo.

Hun pek belhah Getafe defender Zaid Romero handball vangin penalty an chawi leh a, Romero hi yellow card vawi hnih a hmuh avangin hnawhchhuah a ni zui.

Levante tan Iván Romero-a'n penalty aṭangin, an hmahruaina belhchhahna hun ṭha nei mah se, a chhawr ṭangkai thei lo a, Soria-a'n a dansak nawn. Levante vanduai zan angah ngaih theih mah se, an chak zawk avangin an vannei tel bawk.

Getafe hian point 41 hmuin pariatnaah an awm a, an chung chiaha awm Real Sociedad chu point khatin an pha lo. Season tharah Europe inelnaa an tel duh a nih chuan an chetsual a thiang tawh lo.

Hetihlai hian Levante erawh point 29 hmuin 19-naah an chho a, table mawngphah an chhuahsan. La Liga match sarih chiah khelh tur a awm tawh a, inhamtan an tum a nih chuan tha thlah loa an ṭan a ngai tawh.