Romero-a season a tawp

Tottenham Hotspur defender Cristian Romero chu a khup a tihnat avangin a chawlh a ngai a, tun season-ah a hmel kan hmu tawh dawn lo. Premier League-a inhamtan tum Tottenham tan channa nasa tak a ni ang.

Kum 27 mi Romero hi Pathianni zana Sunderland nen an inhmachhawn ṭumin, a teammate, goalkeeper Antonin Kinsky nen an insu palh a, Kimsky hian a luin Romero khupah a tauhsak. A hliam endik a nih hnuah Romero hi kar riat vel tal a chawlh a ngai dawn a, Premier League bakah World Cup khel turin a dinhmun a chiang lo bawk.

Spurs boss Roberto de Zerbi chuan,"Romero hi player ṭha leh innghahna tlak a ni a, ani ang player pawimawh kan chân tur hi a pawi kan ti hle," a ti. Spurs hian Premier League-ah match ruk khelh tur an la nei a, Italian coach De Zerbi hoin relegation zone chhuahsan an tum mek.

Tun season-ah Spurs tan Romero a pawimawh a, match 32 khel tawhin goal ruk leh assist pali a nei tawh, defender tih atan a pui hle. Argentine defender hi a inhliam tak avangin De Zerbi-a'n tlarhnung laiah Micky van de Ven a kawppui turin, Danso emaw Radu Dragusin te a chhawr a ngai tawh dawn.