Pathumnaah Spurs hnehtu Nuggets

NBA season tawp ni khan Denver Nuggets chuan San Antonio Spurs chu 128-118 in an hneh a, Western Conference-ah pathumna niin season an khar. He inkhelah hian Nuggets thiampuipa Nikola Jokic chuan point 23 neiin a langsar lehpek hle.

Denver an chak tak avang hian Los Angeles Lakers chu Western Conference-ah palina an ni a, kar tawp hian playoff an khel ṭan ang. Lakers hian point score hnem zual, Luka Doncic leh Austin Reaves te hliam vanga an khelh loh laiin Utah Jazz chu 131-107 in an hneh bawk. Kum 41-a upa LeBron James pawh a la che ṭha hle a, a la tar lo tih lantirin point 18, assist 6 leh rebound 4 a nei.

Play-off round hmasa berah Denver hian parukna Minnesota Timberwolves an mikhual ang a, Lakers hian pangana Houston Rockets an lo hmachhawn ve thung ang.

Jokic hi kum 31 a ni tawh a, vawi thum lai MVP a ni tawh bawk. Texas-a inkhelah hian minute 18 chauh khel mah se, kumin chhunga NBA award hrang hrang la thei turin game 65 a khel tling tho. Denver tan Julian Strawther chuan point 25 a nei bawk a, Jonas Valanciunas chuan point 16 leh rebound 11 a nei bawk.

San Antonio Spurs tan De'Aaron Fox-a'n point 24 a nei a, an star player Victor Wembanyama erawh chawlh hahdamtir a ni thung. Spurs hi pahnihna an ni a, playoff round hmasa berah Portland Trail Blazers leh Phoenix Suns inkhela chak zawk zawk an hmachhawn ang.

In-play tournament hi regular season tawp ruala khelh tur a ni a, conference pahniha pasarihna aṭanga 10-na te an inel ang a, chutah chuan pasarihna leh pariatna tur an thlang chhuak dawn a ni.

Oklahoma City Thunder (West-a pakhatna), Detroit Pistons, leh Boston Celtics (East-a pakhatna leh pahnihna) te chuan Zirtawpni hian in-play tournament a zawh hunah an hmachhawn tur dik tak an hre thei chauh dawn a ni.