Ghanaian footballer Dominic Frimpong a thi

Ghanaian Football Club Berekum Chelsea player, Dominic Frimpong chu Pathianni zana an team bus-a an chuan laiin rinhlelh thil thua silai hmanga lambun an nih hnuah a thi.

Berekum Chelsea hi inkhel zo a an haw lam chu hmai tuam, silai leh ralthuam kengten an lo lambun a ni tih club thuchhuah chuan a tarlang. Frimpong hi silaia kah a ni a, enkawl nhgal ni mah se a hliam tuar loin a thi. He thil titu zawn beihpui thlak mek a nih thu Police ten an tarlang.

Ghana Football Association (GFA) chuan pawi an tihzia leh an tawrhzia an puang a, kum 20 mi Frimpong hi, "Khawvel hmachhawn tlak thiamna nei, football ngaina leh khelh nuam ti em em, kan league tana mi hlu tak," tiin an thlah.

Frimpong te team hi Samreboi-a Samartex nen Ghana Premier League an khelh zawha an haw lam a ni a, he inkhelah hian 1-0 in an tlawm a ni. Berekum leh an inkhelhna hmun hi km 270 zeta hla a ni.

Berekum Chelsea chuan thuchhuah siamin, "Kan driver-in bus her let a tum laiin hmai tuam ṭhenkhatin bus chu silaiin an lo kap ṭan a, player-te leh staff-te chu himna zawngin a vela hnim pik karah an tlan chhia," an ti.

Ghana thuneitute sawi danin, bus-ah hian player leh official mi 30 an chuang a, silai kheng mi paruk velin an lo bei a ni. Police-te chuan thil thleng chhui turin crime scene expert-te an tirh belh nghal a, he thil titute hi a rang thei ang bera man an nih tur thu an sawi bawk.

Tun hnai deuh lawkah club dang zingah FC Savannah, Wa All Stars, Legon Cities leh Ashanti Gold-te pawhin hetiang ang beihna hi an lo tawk tawh.

Ghanaian sports journalist Muftawu Abdulai chuan tun dinhmunah ram chhung chu mak tihna leh lungngaihnain a khat a tih a sawi a. Fans pawhin inkhel tura khaw danga zin hi a him tawk em? tih an inzawt nasa hle tawh tih a sawi bawk.

"He infiamnaa mi pawimawh ber berte leh mipuite nunna kan venhim sak thei lo a nih chuan, he game khelh hian awmzia a nei lo," tiin Abdulai chuan BBC Sport Africa a hrilh.

Frimpong hian January khan Aduana FC aṭangin Berekum Chelsea hi loan-in a zawm a, a club khelhna hnuhnung ber a ni. Aduana FC chuan a boralna chu an tawrh thu sawiin, an ṭawngṭainaah a chhung te, Berekum Chelsea leh football khawvel mipuite an hriat reng thu an tarlang. "Hahdam takin chawl ang che," tiin an thlah.

Ghanian forward Frimpong hian season tawp thleng Berekum Chelsea-ah hian hun hman a tum a. Game 13 a khelh chhungin goal hnih a thun hman a ni.

Berekum Chelsea hi kum 2000-a din a ni a, a tirah chuan Semereka FC tia koh an ni. Kum li hnuah, Ghana footballer hlui Michael Essien-a'n Chelsea a zawm khan Ghana-ah he English club hi an lar thut avangin an club hming hi an thlak ta a ni.