Silly Point : Mizoram leh champion
TATA Indian Premier League 2026 group stage chawhma lam chanve kan lo zo chho leh ta reng mai a. Neitu thar nei Rajasthan Royals an kal vung hrih hle a. Champion ngun team Chennai Super Kings leh Kolkata Knight Riders te erawh beisei an pha lo hle thung.
Inter Branch YMA cricket-ah zawlnei nih kher a ngai lo kan tih fo angin, tournament ṭan hma ka thuziak chu a taka nemnghehin a awm a. Ramhlun Venglai Branch YMA cricket team te chelhding zo reng an awm lo a. Ni e, fiamthu titak deuhin ka sawi a. CYMA hian Ramhlun Venglai Branch bik hi team hnih chhuah phal se, final-ah an insu ve ve hial ang ka ti a. Ka hmuh dan dik tak pawh a ni e.
India hmarchhak kan ngam mek
Cricket lama la hnufual deuh India hmarchhak state paruk Arunachal Pradesh, Manipur, Meghalaya, Mizoram, Nagaland leh Sikkim te chu BCCI Tournament an khelh piah lamah, off season-ah hian hma a sawmna turin The North East Cricket Development Council (NECDC) kaltlangin tournament an khel ṭhin a. Kumin hian under 23 hmeichhia (Sikkim-a nghah) leh under 19 mipa (Nagaland-a nghah) te kan hmachhawn a ni.
Mipa under 19 hi final-ah ṭhenawm ram Manipur lakah an vanduai a. Zemabawk rawlthar Henry Lallawmzuala chu bowler ṭha ber a thlan a ni a, amah hrualchuaktu Pu Zomuansanga (Zemabawk CC) leh lo tuaihriamtu Mizoram Cricket Academy a faculty ten fak an phu hle. He tournament-a tun dinhmun luahtir tu head coach Lalhmingliana (Chanmari ) leh Rosiamngheta (Zotlang) te kan hmaih phal lo ang.
Aw Mizo nula ṭang fan fan
Cricket khel tur zawn chawp hunlai te, tlawmngaih chhuaha tel hram hram tura kan inngen lai te kha kum 10 pawh a la ral lo. CAM hruaitu hmasa leh tuna hruaitu ni mek te hmathlir professional tak rah chu a lo kuhmum ṭan mek zel a.
Coach Lalruatsanga (Chanmari hrualchhuak leh Vanlalremkima Ralte (Bawngkawn South) kaihhruai Mizoram Under 23 hmeichhe team te chu North East India champion an ni ta mai hi mumang te pawh a ang tum tum mai a ni.
Talent a awm
Zep thu a awm lo a, Mizo mipa te hian IPL te, India team a khel tur hi chuan generation hnih tal a liam a la ngaiin ka hria. Tlawma lak chi pawh a ni lo a, India Cricket inphun nghet lutuk leh British hunlai aṭanga professional league lo khel tawh state association dang te hi an lo kal thui tawh em vang a ni a. Amaherawhchu chak takin he inkar hi kan ti zim kumtin ve zel a ni.
Hmeichhia erawh a kawng a la tawi a, WPL te, India under 19 te, India hmeichhe team thlengin tun chhuan ho pawh hi an in vaw thleng anih chuan, thil makah ka ngai tawh miah lo thung ang. Talent kan neih miau avang leh state lei rem rap tawh zawk te nen kan inthlauhna hi a zim tawh em vanga sawi ngam ka ni.
Zo lanu hmelṭha te
Hmathlir thui tak nei chungin CAM lamin under 23 mah ni se, kum 18, 19 rual ho atangin team a chhawpchhuak a. Chhinga Veng nula team captain Lalhmangaihsangi inkhel apianga man of the match bakah tournament chhunga khel ṭha ber leh batter tha ber lawmman a hui aṭang hian, captain entawntlakin hma a hruai a, a hnung pawp a dawm tih a chiang reng mai.
Jacinta Lalṭanpuii hi kumina Mizo hmeichhe cricketer zinga senior, under 23 leh under 19 team a inkhel kim vek, team rinrawl ni vek thei khawpa talent nei a ni a. BCCI Tournament-a Mizoram min champion pui hmasa bertu Vanlalruatpuii (Under 19 women) pawh a kum phu loin a puitling a, team innghahna tlak a ni tih a chiang reng mai. In naupanna tuman ngainep suh se.
Mizo nula kal zel rawh u
Association professionalism-na kawnga hmasawn tum leh hmasawn mek, coaching staff in zir reng leh hmasawn chak tak te enkawlna hnuaiah hian, kan Mizo nulate hian hmabak êng tak an nei tih a chiang reng a.
Cheng nuai tam tak an hlawhchhuah hi chu thudang ni se, tuina leh tumruhna an tlakchham ngai loh chhung chuan, an sum bawm leh malsawmna dang pawh a la luangliam dawn chauh ang tih hi ka ring tlat a ni.