Kerala khelmualah NorthEast United

Indian Super League chu zan hnih an chawlh hnuah, zanin dar 7:30 hian khelh chhunzawm leh a ni dawn a, Kerala Blasters chuan NorthEast United an mikhual ang.

Blasters hian Bengaluru coach hlui Ashley Westwood chu la lut tharin, English coach hnuaia an match hmasa berah chak nghal lo mah se, a match hnihnaah erawh team che ṭha tak Bengaluru chu 2-1 in an hneh.

Kerala club tan league match riat an khelh tawha an vawi khat chakna a ni a, beiseina thar an nei dawn. Bengaluru an hneh ṭum hian player thar Franchu chuan bul ṭan nghalin, goal a khung nghal.

Kum 27 mi attacking midfielder hi Real Madrid tan pawha lo khel tawh niin, season hmasa lawka Cypriot First Division club Karmiotissa tana khel a ni a, Highlander tana harsatna thlen turin a ṭha tawk.

NorthEast hian result an nei ṭha bik lo. League match sarih an khelh tawhah vawi khat chiah an la chak a, an match hnuhnung pahnihah goal sarih chhuahin, goal khat chiah an khung.

Highlander hian midfielder Frendy Chawngthansanga bakah, Aizawl FC aṭanga lakluh Lalrinzuala leh Lalbiakdika te an kawl a, Blasters-in Freddy Lallawmawma leh R. Lalthanmawia an kawl.