Robertson-a'n Liverpool chhuahsan dawn

Mohamed Salah-a'n Liverpool a chhuahsan dawn tih a chian hnuah, Reds legend Andy Robertson pawhin Anfield a chhuahsan dawn tih a chiang ve leh ta a, season tawp rualin Scottish fullback hian a puanthuah a tel fel ang.

Kum 32 mi Robertson hian season tawp rualin Reds-a a contract hi a hmang zo tawh dawn a, Arne Slot-a hnuaia hmun a chan phak tawh loh avangin cham ai chuan chhuah hi a finthlak zawk - tun season-ah vawi 31 inlan tawh mah se, hemi zinga match 16-ah hian bench aṭangin a lut.

Robertson chuan, "Tunah chuan ka chhuah a lo hun ve ta a, hlim hmel pu chungin he club-a kum kua ka lo hman tawhte kha ka thlirkir ṭhin dawn a ni," a ti a, Liverpool a thlah.

Scotland captain hian kum 2017 khan Hull City aṭangin Liverpool hi pound maktaduai riatin a zawm a, a man zat ngaihtuah phei chuan Reds hian an lei fuh thlawt tih loh rual a ni lo.

Liverpool tan hian inelna hrang hrangah match 373 khel tawhin, goal 13 a khungsak a, assist vawi 69 ngawt a nei thei. Reds tan Premier League-ah vawi hnih champion-in, FA Cup, League Cup (2), FA Community Shield, Champions League, UEFA Super Cup leh FIFA Club World Cup te a lakpui bawk.

Robertson chuan, "Liverpool legend ka nih leh nih loh chu midang ngaihdanah innghat se, mahse, he club ka zawm tirh minute aṭang khan Liverpool tana hlawhtlin kha ka duh em em a ni.

"He club-a nomawi chawi a, a awmna ṭhina Liverpool dah leh kha ka duh ber a ni. Chutiang ang taka he team din thar lehtu zinga ka tel hi ka inchhuang hle a ni," a ti a, Reds-a a sulhnuah a lawm tawk.

Robertson chuan a tan Anfield chhuahsan a harsatzia sawiin, "He club hi ka tan chuan engkim a ni a, fan te leh he club nena inkungkaihna nei zawng zawngte hi ka tan chuan an hlu thlawt. Vawiin thleng hian an lakah bat tam tak ka nei.

"Kum kua zet ka lo tih tawh angin he club-a ka awm tawp ni thlengin theihtawp ka chhuah chhunzawm zel dawn a ni. Fan-te nena inthlahna hun chu kan la nei turah ngai ila, tunah chuan ka la inpeih lo a ni," a ti a, Liverpool chhuahsan a hreh hle.

Reds hi Premier League table-ah pangana ni mekin, point khat chiahin parukna Chelsea aiin an sang zawk - season thara Champions League khel lo thei dinhmunah an ding mek a, zanin dar 10:00-ah Fulham an mikhual ang.

Robertson ang thoa season tawpa chhuak tur Salah pawhin a ṭhianpa hi thlahin, "I ṭhian leh i khelhpui nih hi ka tan chuan chawimawina a tling a ni. Nomawi chawi theih zawng zawng i chawi a, club legend niin i chhuak dawn ta.

"Kan intawn leh ngei ka beisei," a ti - Salah leh Robertson te hian kum 2017 nipuiah ve ve Liverpool hi an zawm a, an chhuak rual leh dawn ta bawk.