Mizo tan wrestling-ah medal pathum

Mizoramin wrestling-ah hming an chher a, medal pathum an hlawh - Elizabeth Rohlupuii chuan silver medal a lo hawn a, gold a hlawh phak ta lo chiah chiah erawh a uiawm hle.

Eli-i hian 68kg huangah inelna hi hmachhawnin, final-ah Karnataka nula Prisita Ped a ngam ta lo - gold medal hlawh chhuak ta lo mah se, Mizo inbuan chak zinga final khel thei awmchhun a ni thung.

Melriat nula Elizabeth-i hian wrestling-ah Mizoram tan medal a lo hlawh chhuak nual tawh. Mizo inchaiah nu laihawl champion lai niin, SAI Hostel, Mission Vengthlang aṭanga inzir chhuak a ni.

National Centres of Excellence (NCOE), Lucknow-a kum hnih zet lo inzir tawh niin, kum 2014 khan Inter SAI-ah bronze a la a, School Games 2019-ah bronze, Khelo Youth Games 2020 ah silver, North East Games 2024-ah gold a lo la tawh bawk.

Chhattisgarh-a neih inelnaah hian Mizoram aiawhin wrestler pali an kal a, Eli-i bakah hian Bethlehem nula Lalvenhimi (53kg) leh Dilkhan nula Lalhmangaihsangi (76kg) te chuan bronze medal an hlawh chhuak ve bawk a ni.

Mizoram wrestler zingah Jacob Lalrinliana erawh a vanduai a, medal a hlawh chhuak zo ta lo. Mizoram inchai chakte hi NIS coach pahnih C. Lalhmunfela leh H. Lalhmingmawii te chuan kaihruaiin, Mizoram Wrestling Association Jt. Secretary Hmangaihlima chu team manager a ni bawk.