Women's League-ah James & Juda's Mem FC an champion

MBOCWWB Women's League 2025-26-ah James & Juda's Memorial FC chuan April 2, Ningani khan final-ah Springfield HSS FC 3-1 a hnehin an champion a, Chite Veng Playground-a inkhelah hian Mizo hmeichhe striker hriam Lalrinmuani'n hattrick a siam. Champion-na kawnga player pawimawh Immanuel Malsawmtluangi chu best player-ah thlan a ni.

James & Judas Memorial FC hian final-ah Rinmuani hmangin minute 49-naah goal an khung a, Springfield HSS-in minute 88-naah Lalrinzuali hmangin an sut. Hun pangngaiah inhnehtawk turah ngaih theih mah se injury time-ah Rinmuani'n goal hnih a khung a, James & Judas a champion pui.

Women's League-ah hian team pariat an tel a, group pahnihah inṭhenin group A-ah Starlight FC, Lalhmachhuani Mem FC, NCC Mizoram leh Springfield HSS te an awm. Group B-ah LM FC, James & Judas Mem FC, Tlangvaltea FC leh Mizo Football News te an awm ve bawk.

Group pahnih aṭangin a sang pahnih semifinal an lut. James & Judas Memo FC hian final lut turin NCC Mizoram 2-1 in an hneh a, Springfield Hr Sec School hian LM FC 3-0 in an hneh ve bawk. Ningani hian pathumna zawnna neih a ni a, NCC Mizoram hian LM FC 3-1 a hnehin pathumna an ni.