Verstappen-a'n F1 chawlhsan a tum ?

Japanese Grand Prix neih zawh takah sawi zui tur a tam a, Mercedes driver Kimi Antonelli Formula 1 chanchina championship leader ni thei naupang ber a ni. Hetihlai hian Red Bull driver Max Verstappen chuan tun season tawpah F1 chawlhsan a tum thu a sawi a, hei hi tuna dan thar hman mekah a lungawi loh vang a ni.

Suzuka-a an intlân zawh hian, Middle East-a buaina chhuak vangin Bahrain leh Saudi Arabia Grand Prix-te ṭhulh a nih tak avangin, F1 hi chawlkar nga chhung chawl rih a ni dawn. Verstappen hian F1 dan thar hman mekte hi thlak danglam se a ti hle a, a chhan chu he dan thar hian car-ah danglamna hrang hrang a siam a, a hma aia khalh nuam lo a tih zawk vang a ni.

Red Bull driver hian tun season ṭan hma aṭang daih tawh khan a lo sawi tawh a, 2026 hman tur car-te simulator hmanga a vawi khatna atana a han khalh chhin aṭang tawh khan a lungawi loh thu a sawi chhuak tawh. Season ṭan dawnah khan engine tharin mamawh a ngah ta lutuk chu a sawisel leh bawk.

F1 hi FIA-in a lo tih ṭhin danin car regulations a thlak thar kum a ni a, 2026- a hman ṭan turin car bakah engine, ke size thar leh wing zawng zawng a tharin an thlak vek. Sawiseltu leh duh lotu tam tak karah faktu an awm bawk.

Car thar khalh nuam ti zingah Lewis Hamilton a langsar a, kum 41 mi Hamilton chuan,"Thil thar kan la hriat loh tam tak a awm a, a hmasa a mi nen a danglam avangin a harsa deuh maithei, mahse keichuan a nuam ka tihna a bo phah chuang lo. Car te hi khalh a nuam sawtin ka hria a, car hmaasa ho aiin control an nuam zawk," a ti.

Hamilton bakah George Russell chu car thar duhtu zingah a langsar a, Russell hian season ṭan hma khan Verstappen nen inel a chak thu a lo sawi tawh. Mercedes driver Russell chuan, "Tunah chuan team zawng zawngin engine an nei ṭha tawh a, chuvangin Max (Verstappen) pawh a phur sawtin ka ring a, ani nen inel ka châk tawh hle," tiin a lo sawi tawh.

British driver Russell hi Australian Grand Prix, Albert Park Circuit, Melbourne-a neihah a chak nghal a, Chinese GP-ah pahnihna niin a teammate Kimi Antonelli a tluk lo. Pathiannia neih zawh tak Japanese GP-ah erawh palina a ni thung.