Germany hneh lotu Ghana-in an coach an ban

Thawhṭanni zan friendly match-ah Ghana chuan 2-1 in Germany an hneh lo a, an inkhelh zawh hnu lawkah Ghana hian an coach Otto Addo an ban. Kum 50 mi Addo hian Black Stars hi World Cup thlenpui mah se inelna takah a kaihruai dawn ta lo.

Ghana hian Germany laka an tlawm hma hian Austria lakah 5-1 in an mualpho. Friendly match hnuhnung zawkah Germany tana Kai Havertz-a goal khung chu Abdul Fatawu-a'n sut mah se, mualneitu tan Deniz Undav-a'n chakna goal a khung. Germany an lawm a, Addo-a'n a hna a chan phah thung.

An inthlau

MHPArena, Stuttgart-a inkhelah Germany-in inkhel an thunun tluan a, an ṭhat dan berin inrem lo mah se an hmuhnawm a, goal erawh hmuh tur erawh a awm lawk lo.

Die Mannschaft tan Nick Woltemade, Jonathan Tah leh Florian Wirtz ten an chance neih an chhawr ṭangkai thei lo a, Liverpool midfielder Wirtz hian goal khung angah inngai mah se a offside avangin pawm a ni lo.

First half hun pek belhah Wirtz-a'n chance a nei leh a, a ball pet chu Ghana defender Jonas Adjetey-a'n a kutin a khawih fuh palh a, penalty an chawi. Havertz-a'n cool takin penalty aṭangin Germany hmahruaina goal a khung a, chawlhlawk an hmang chhunzawm.

Second half-ah pawh Germany bawk an chungnung zawk a, Ghana-in goal an khung thung. Mikhual team tan Derrick Kohn-a'n chak taka ball a lakluh hnuah a cross a, vengtu nei lo Fatawu-a'n awlsam takin a pet goal.

Ghana lawm chhung erawh a rei lo a, minute 88-naah Germany-in mawi taka ball an inpek hnuah Undav-a'n hnai tak aṭangin a pet goal a, hun a tawp zui nghal avangin Germany chak nan a tawk.

Inṭhenna

Inkhelh zawh aṭanga rei loteah Ghana-in an coach Otto Addo chu an ban thu an puang zui nghal a, World Cup ṭan nan ni 72 chauh awm tawh mah se Addo hi nimin chawhma lam khan an ban tih an puang. Germany nen an inkhelh hma hian Zirtawpni khan Vienna-ah Austria lakah 5-1 zet khan an lo tlawm tawh bawk.

World Cup group khata England nen awm dun tur 'Black Stars' hi an game khelh hnuhnung paliah an tlawm vek a, Manchester City winger Antoine Semenyo leh Tottenham forward Mohammed Kudus te kawl mah se, Addo enkawlna hnuaiah beisei an pha lo a, 2025 Africa Cup of Nations-ah pawh khan an tling lo. Ghana Football Association chuan Addo an ban thu an puan rualin an ram team enkawltu tur chu a rang thei ang bera an puan tur thu an sawi bawk.

Kum 50 mi Addo hi Germany-ah piangin a khelh hun chhung zawngin German club tan vek a khel a, ram tan erawh Ghana tan khelin vawi 15 inlanah goal hnih a khung. March 2024 khan an ram enkawl hna hi a vawi hnih nan a thawk leh a, mahse tun hnaiah a che ṭhat pui hleithei lo a, World Cup a hnai tawh hle mah se a hna aṭanga ban a ni ta ni.