Arsenal hliam vangin an buai dawn nge an fimkhur?
Kumin March thla international break-ah ram tan Arsenal player 18 koh an ni a, 10 an inhnukdawk. Gunners player 10-te hi hliam tak tak vang nge fimkhur vanga ram tana koh chhang lo tih hi zawhna awm thei tak a ni.
Premier League club 20 aṭangin player 228 koh an ni a, player 22 inhnukdawkin Arsenal-in player 10 ngawt an thawh. League nomawi inchuh boruak a san chhoh avangin London club/player-te chet dan hian sawi zui a hlawh hle.
Inhnukdawkte
Carabao Cup final-ah Arsenal-in Manchester City an hneh lo a, inkhelh zawhah William Saliba-a'n ke rek hliam vangin France team a zawm dawn tih an puang nghal. League Cup final-ah hian Saliba hi a khel tluan thung.
England forward Eberechi Eze (chawn), Norway midfielder Martin Odegaard (khup) leh Netherlands defender Jurrien Timber (ṭhal) te pawhin an ram kohna an chhang thei lo a, heng player-te hi chu hliam vangin League Cup final-ah pawh an inlan thei lo.
Wembley Stadium-a hliam vanga lakchhuah Belgium forward Leandro Trossard pawh a inhnukdawk. England trio Declan Rice (intauhna), Bukayo Saka (intauhna) leh Noni Madueke (khup) te bakah Spain midfielder Martin Zubimendi (khup) leh Ecuador defender Piero Hincapie (chhan tarlan loh) te ram kohna chhang mah se an inhnukdawk leh bawk.
Tuchel-a'n a sawifiah
England-in friendly match hmasa zawkah Uruguay nen 1-1 in an inhnehtawk a, Rice leh Saka te an tel lo. Madueke erawh hliam vangin lakchhuah a ni thung. Three Lions manager Thomas Tuchel chuan, "Rice leh Saka te hian Japan hmachhawn an châk ve ve a, amaherawhchu an khelh luih chuan an hliam hi belhchhah a hlauhawm. Medical test an nei vek a, anmahni pawh ka hmu a, rinhlelh tur a awm lo," tiin a chhan.
England hian nizan khan Japan an hmachhawn a, result kan hre hman lo. Tuchel-a'n Arsenal duo Rice leh Saka te chhan viau mah se khawthlang media ṭhenkhatte chuan German manager sawifiahna hi a pawm lo a, ram aia club an ngaih pawimawh vangah an ngai thung.
Arsenal hmabak
Arsenal-in Manchester City an hneh loh avangin quadruple champion beiseina a tawp tawh a, treble champion erawh an la beisei thei thung. London club hian April 4, Inrinni zan dar 12:30 hian FA Cup quarterfinal-ah Southampton an tlawh dawn.
Gunners hi League Cup final-a an chetsual tawh avangin inrintawkna neih nan FA Cup-ah Saints an hneh ngei a ṭul a, Premier League erawh an ngaih pawimawh ber a ngai thung Arteta hote hian league match khelh hmain Sporting Lisbon nen Champions League quarterfinal first leg an khel leh phawt ang.
Premier League-ah Gunners hian Bournemouth, Manchester City, Newcastle United, Fulham, West Ham United, Burnley leh Crystal Palace an hmachhawn dawn a, an elpui ber City laka point an hmuh theih chuan nuam sa takin season an khar theih a rinawm.