Jamaica khingpui tur Congo

Inter Confederation Playoff final lut turin Jamaica-in New Caledonia an hneh a, zanin dar 2:30 hian Zapopan, Mexico-ah DR Congo nen final an khel ang. Heta chak zawk hian World Cup an khel dawn.

Jamaica tana World Cup beiseina chhi nung turin New Caledonia lakah Bailey Cadamarteri-a'n goal awmchhun a khung a, kum 1998 hnua a vawi khat nan World Cup khelh theihna hun ṭha a inhawng.

Reggae Boyz khingpui tur DR Congo pawh hian tun hmain World Cup hi an khel tawh a, kum 1974 khan Zaire hming an put laiin khawvela football inelna ngaihhlut hlawh berah hian an tel tawh. DR Congo hming an put hnuah an tel tawh lo thung.

Ram pahnih hi tun hmain an la inhmachhawn ngai lo a, an intawn hmasak ber tur hi inkhel pawimawh bik a ni dawn. Congo hian Mexico boruak tem nan kar liam ta khan Bermuda nen friendly match an khel a, 2-0 in hnehna an chang. Sébastien Desabre hote hi final-a Jamaica an hmachhawn hunah pawh an inringtawk khawp ang.