Inter Miami-in Messi an chawimawi

Major League Soccer club Inter Miami chuan an player Lionel Messi an chawimawi a, Argentine forward hi an team tana khel mek mah ni se, an stadium chhunga stand pakhat chu a hming chawiin an phuah.

Inter Miami hian Chase Bank stadium chu an khelmualah an hmang ṭhin a, mahse, mipui 21,550 lenna stadium hi chhuahsanin, an stadium thar Miami Freedom Park stadium lamah an insawn tawh dawn.

Miami hian an stadium thar tur hi Brazilian financial technology company Nubank nena an thawhdunna angin, 'Nu Stadium' tiin a hming an phuah a, heta stand pakhat chu 'Lionel Messi Stand' an ti dawn a ni.

Inter Miami stadium thar hi mipui 26,700 lenna niin, April 5, zing dar 5:00-a Austin FC an mikhual hunah an khelmual thar hi an hmang ṭan dawn a, he hunah hian Messi stand pawh hi tlangzarh a ni dawn.

MLS club chuan, "Messi la khelh lai ngeia a club khelmuala a hming chawi stand awm tur hi chu thil danglam tak a ni," tiin an sawi a, "Club mi ropui kan chawimawi hian kan thlah dawn tihna a ni lo a, kan hnena thil ropui tak lo awm mek hi kan lawm a ni, tihna a ni zawk," an ti bawk.

Messi hian kum 2020 khan a vawi khat nan season an hmachhawn ve chauh a, kum 2023 khan Messi hian a zawm. Ballon d'Or vawi riat dawng tawhtu forward hian US club tan hian match 94 khel tawhin, goal 82 leh assist 53 a nei.

Kum 38 mi forward hi Miami tana goal khung hnem ber leh assist ngah ber ni nghalin, 2023 Leagues Cup, 2024 MLS Supporters’ Shield leh 2025 MLS Cup-ah te a champion pui.