Weightlifting-ah Mizoram pahnihna

Khelo India Tribal Games (KITG) weightlifting-ah Mizoram an che ṭha a, India rampui inelnaah pahnihna an ni. Mizoram tan Zosangzuali, Isak Malsawmtluanga, Silvan Beirothatlo leh David Zohmingmawia ten gold medal an chawi chhuak.

Mizoram hian gold pali bakah silver pathum an la a; Laithanpuia, Lalfakawma leh David Lalzawmdika ten silver medal an la, Jacob Vanlaltluanga'n bronze a la ve bawk. Weightlifting-a Mizoramin result ṭha an neih theih nan Khelo India State Centres of Excellence (KISCE) a pawimawh hle.

Mizoram manager Malsawma Khiangte chuan, "Khelo India Tribal Games hmasa bera result ṭha kan neih hi a lawmawm a, chutihrualin hei hi a bul ṭanna chauh ni se, weightlifting hmasawn nan theihtawp kan chhuah zel ang," tiin Vanglaini a hrilh.