Inter Village Football-ah team 17 inziaklut tawh

Aizawl District Football Association chuan Aizawl District huam chhunga VC/LC tan 'LESDE Inter Village/Local Council Football Tournament 2026' a buatsaih dawn a, April 14, 2026 aṭangin khelh ṭan a ni dawn. Entry fee pe tawh team 17 an awm a, nikum CYMA Football final-a inhmachhawn Bethlehem Vengthlang leh Republic Veng te entry fee pe hmasa pahnih an ni.

Entry fee hi Rs 2000 a ni a, April 7, 2026 thleng a pek theih. GPay hmanga pe duh tan 9862387738-ah a pek theih a; The Mizo Apparel (Vaivakawn) leh Younix (Zarkawt) ah a pek theih bawk. Inelna hi RG Stadium-ah khelh a ni ang.

Aizawl District chhunga VC/LC khat aṭangin team khat zel chhuah theih a ni a, Aizawl District chhunga veng/khua tel lo aṭangin player pathum lak theih (re-inforce) a ni ang. Player pathum aṭang hian playing XI ah player pahnih chhawr theih an ni ang.

Player chu mahni vote thlakna khua/vengah ngeiah khelh tur a ni. Player lak (re-inforce) te chuan Voters ID an nei ngei ngei tur a ni. Aizawl District chhunga mi chauh Re-inforce phal a ni.

Voters ID endikna atan hian kum 2025 VC/LC Electoral Roll hman a ni dawn. Kum la tling lo (Voter ID la nei pha lo) te chu Digital Birth Certicate hmangin an kum endik a ni ang a, an awmna khua/veng tichiang turin Ration Card en a ni bawk ang. Heng Document pahnih aṭanga pawm theihte chauhin an khel thei ang.

Tun ṭum inelnaah hian ticket share system hman a ni dawn a, first round aṭangin, team-te leh organiser lamin ticket aṭanga sum hmuh an insem ang. Semifinal leh final-ah erawh lawmman team tan ruahman a nih avangin organiser lamin an chang thung ang.