Inter Kashi lakah Bengaluru chak

Bengaluru-in Indian Super League nomawi chawi an tum tih pholangin, Pathianni zan khan Inter Kashi chu khualmualah 3-1 in an hneh a, point thum chiahin hmahruaitu Mumbai City an phak lo mek.

Bangalore club tan Ashique Kuruniyan chuan minute 20-naah goal hmahruai khungin, Inter Kashi hian Alfred Planas hmangin an chhanglet zui mai a, 1-1 in first half a tawp.

Mahse, second half-ah Bengaluru tan Brian Sánchez inlarin, goal hnih a khung a, minute 69-naah hmahruai nawnna khungin, hun pek belh minute riatnaah chak a nemnghet zui.

Bengaluru tan Lalremtluanga Fanai chuan inkhel bul a ṭan a, Mizo midfielder ṭhangduang hian India club ṭha ber pawlah hmun pawimawh a chan chhunzawm zel.

Pathianni zan inkhel hmasa zawkah Chennaiyin leh FC Goa chu 1-1 in an inhnehtawk thung. Chennai club hian Irfan Yadwad-a goal chu an chakpui tawh mai dawn emaw an ti hman a, mahse, hun tawp nan minute thum chauh a awm tawh tihah Sandesh Jhingan chuan si phurh sutna goal a khung.

Chennaiyin tan Laldinliana Renthlei chuan inkhel bul a ṭan a, PC Laldinpuia leh Lalrinliana Hnamte (Terina) te chu bench aṭangin an lut.

Goa lamah pawh Ayush Chhetri-a'n bul ṭanin, Daniel Lalhlimpuia chu bench aṭangin a lut ve bawk.