A thutlukna siamah Arteta a inchhir lo

Carabao Cup final-a danglamna thlentu chu Mikel Arteta thutlukna siam a ni a, Kepa Arrizabalaga a luhtir vangin Arsenal-in kum 2020-a FA Cup an champion hnuah nomawi lian tham an la chawi leh lo.

Spanish manager Arteta chuan, "Ka thutlukna siam hi kumtluana kan thutlukna siam dan a ni. Carabao Cup-ah hian Kepa hi a inlan ṭhin a, final kan thlen theihna chhan a ni. Nomawi inchuhna bera player dang ka thlan chuan a dik lo ang," tiin Spanish keeper a thlan chhan a sawifiah.

Inkhel chungchang sawi zuiin Arteta chuan, "A na takzet a, a bik takin player-te leh min ṭantute tan a na lehzual ang. Nomawi chawi kan duh takzet a, final-ah bul ṭan ṭha mah ila, second half-ah kan khel ṭha lo. Chance ṭha kan nei hmasa zawk a, kan hmang ṭangkai lo a ni," a ti.

Arteta chuan, "Tun ṭuma kan tawrhna hi tun season-a kan khelh hmabakah kan hriat reng a ṭul dawn. Tunah hian season ṭha tak hmang thei dinhmunah kan la ding," tiin hmabak êng tak an neih thu a sawi.

Arsenal hian Premier League-ah point 70 hmuin Manchester City aiin point kuain an hmu tam a, Champions League-ah quarterfinal lutin Sporting Lisbon nen an inhmachhawn dawn. FA Cup-ah Gunners-in quarterfinal an lut bawk a, Southampton nen an inkhel ang. Arteta hote hi League Cup final-ah vanduai mah se treble champion thei dinhmunah an la ding.