Chanmari an danglam tam zawk

MPL12 final aṭanga thlirin Chanmari FC an danglam tam zawk. November 1, Inrinni khan MPL final khelh a ni a, minute 24-naa Christopher Kamei-a penalty hmangin Chanmarians an chak. MPL12 champion hian coach bakah player thar an ngah zawk. Aizawl FC erawh R. Lalruatfela hoin danglamna a tam lo hle.

Chanmari hian Indian Football League-ah hliam vangin defender FC Lalhmunmawia an chhawr thei lo a, chutihrualin IFL kaipuitu Lalhmangaihsanga (Papuia) an lalut. MPL12-ah Lalrinchhana Tochhawng a la pawimawh a, IFL-ah erawh Chanmari captain hlun hi Zothanpuia (Thangpuia) nen rin an hlawh tawk lo.

Papuia hi defence laiah Malsawmsanga Renthlei nen an inkawp ber a, mah se Champhai tlangval Sawmsawma hi Dempo nen red card an hmuh avangin Shillong Lajong an hmachhawn ṭumin Brazilian defender Marlon a rawn lut. AFC an hmachhawn hunah tlarhnung laia bul ṭan tur hriatthiam a har.

IFL-ah Chanmari an ṭha sawt tiin an sawi theih a, Christo an la kawl bakah Brazilian forward Jota leh Saikhamakawn aṭangin Suanngaihmuana an lalut bawk. Chutihrualin MPL12-a player pawimawh Joel Lalramengmawia, Aron Vanlalrinchhana, KC Malsawmsanga, K. Lalruatdika leh F. Malsawmsawmtluanga te an la pawimawh reng.

Aizawl FC erawhin player ngai bawk rinrawlah an hmang a, coach R-a hnuaiah an inhrechiang tawh hle. MPL12-a goal khung khawl Zomuansanga'n IFL-ah pawh goal a khung tho a, Lalhriatpuia pawh bench aṭanga rawn lutin hun tawp lamah a pawimawh ṭhin hle.

Lalawmpuia Sailo leh K. Vanlalhriatzuala ten midfield an luahlum ṭha a, tlarhma lamah Zomuana thlawp turin Vincent Lalduhawma leh Laltlanzova te an awm. Hliam vangin Sawma Tlangte bul a ṭan ngai lo a, Lunglei Zobawk tlangval hi a dam tawh avangin starting XI-a lut chho thei reng a ni bawk.

Aizawl FC hian Colombian defender Luis Rodriguez, Brazilian forward Higor, Champhai midfielder JH Remlala bakah an player hlui Laldanmawia te an lalet a, MPL12 final aiin an squad a chhah tawh zawk. Diamond Harbour an hmachhawn ṭumin bench aṭangin Luis a rawn inlan a, Colombian defender hian bul a ṭan a nih pawhin a mak lo ang.