Silly Point: Cricket Nipui
India chuan T20 World Cup nomawi a humhim ta ngei a, kan hma lawkah IPL 2026-in min lo hmuak leh bawk. Amaherawhchu tun ṭum chu tualchhung leh a chhehvel cricket in thai lang teh ang.
Champion & Mizoram
Tun 2025-26 Indian cricket season chu Mizoram cricket leh champion hi a kalkawp deuh tlat mai a, kan player-te, coaching staff leh CAM lamin nasa takin hma an sawn tih tilang chiangtu a ni.
Hmeichhe under 23 lamah Plate division bye bye turin Chandigarh khawpuiah champion kan han ni leh te hi a va ropui em. 50 overs cricket hi thil namai lo a ni a. Skills, technique & tactics ṭha tawk tak neih loh chuan vanneih ngawtna chi a ni lo.
Kan Mizo nulate an ṭha tawk a, hma nasa takin an sawn tih a hriat reng mai. Tihian tui let hnuah tun season chhung hian BCCI inelna pathumah Mizoram chu champion kan ni thei a. Tournament pathum final-ah a vanduai zawkah kan ṭang bawk.
Local cricket
Kan Mizoram tualchhung cricket inelna sang ber 1st Division tournament pawh khelh zawh a ni ta a. Rinkai zawk Chanmarians CC te final niah an irhfiak a, thaza rual leh tawnhriat ngah inremkhawm nalh tawk Ramhlun Venglai CC te kum 2025-26 Mizoram champion an ni ta a ni.
Law of average
Khawvelah hian eng thil mah hi kumhlun a awm lo a, ṭha famkim a awm hek lo. Chanmarians te an final zinkawngah league match sarihah saipui kal ang maiin an tumpuite an hnehsawh thei khawp mai a. Finalah pawh hian rinkai zawk an ni.
Mahse infiamna khawvel sap ṭawngkam pakhat awm chu 'law of average' an ti a. 1992 Barcelona Olympics-a US Dream Team ang ngawt te a nih loh chuan, engtik niah emaw chuan an khelh ṭhat loh ni, an tluan loh ni rawn thleng tur a ni a, final-ah ber kher a rawn inherchhuak. Final hmuhnawm lutuk loh te pawh a nih phah ta zawk. 2023 ICC World Cup-a India team lo tawn tawh aṭang khan a chiang mai awm e.
Group stage lamah han tawlhthlu khut khut mah se, tournament reng renga hi chuan a hun taka a mahni theihna vawrtawp thlen (peaking at the right time) an tih hi a pawimawh. Ramhlun Venglai CC te final-ah an game ṭha ber an pho chhuak a, champion tura rinkai ber Chanmarians CC nena nomawi an inchuh chu high sikul leh primary sikul naupang intum ang lekah a chang ta a ni.
YMA lam aw!
A cricket standard chu sang lo mah se, a boruak erawh lian ber Inter Branch YMA Cricket Tournament chu karleh hian kan ṭan leh dawn a nih kha maw. Tuna 1st Division champion Ramhlun Venglai hi vengchhung hlang anga khel an ni a, rinkai ber leh ranking ah pawh sang filawr lak tur an ni.
Hetia han en mai phei chuan elpha tur an awm meuh lo. Durtlang Branch nen ṭum thum a zawnin an final tawh a. Kumin hi a ṭum lina a ni dawn nge, Branch hming thar kan hmu dawn tih hi thu ngaihnawm tur a ni.
Knockout tournament leh cricket bikah chuan T20 hi palian Goliatha te ang tukzal tura Davida te ang pa te deuh tan dawhsan ṭha ber a ni e, an tih kha maw.
Mizoram cricket vul zel rawh se.