Sporting hneh lotu Bodo/Glimt an tla

Tun season Champions League-a mipui barakhaihtu Bodo/Glimt chuan quarterfinal an lut zo lo a, Thawhlehni zan khan Sporting Lisbon lakah goal nga chhuahin goal an khung ve thei lo a, aggregate-ah 5-3 in an chak lo a, UCL an mangṭha.

Estádio José Alvalade, Lisbon-a inkhelah Bodo/Glimt-in beisei an pha lo a, ball an chan tlem bakah chance an insiam hleithei lo. Mualneitu erawh an goal bawh a na a, vawi 36 zet shot neiin, Goncalo Inacio, Pedro Goncalves, Luis Suarez, maximiliano Araujo leh Rafael Nel ten goal khat ṭheuh an khung.

Minute 34-naah goal lut ṭanin, Inacio-a'n corner aṭangin a tauh lut a, Portuguese defender Inacio-a'n a tauh ṭha takzet, Sporting an phur hle.

Mikhual Bodo/Glimt hi chance nei lo tawp an ni bik lo a, first half tawp hma hretin Odin Luras Bjortuft-a'n goal ban a tauh per dawp a, tauh lut ngat se inkhel result a danglam thei hial ang.

Sporting-in goal an khung belh leh a, minute 61-naah Luis Suarez-a cross chu Goncalves-a'n hnai tak aṭangin a khung a, Bodo keeper Nikita Haikin tan dan ngaihna a awm tawh lo.

Portuguese club an phur laklawh a, Iván Fresneda cross chu Bodo defender Fredrik André Bjorkan-a'n a kutin a khawih fuh palh a, VAR rawn a nih hnuah penalty an chawi. Penalty pet goal turin Luis Suarez-a'n harsatna a nei lo a, tun season UCL-a a goal lina a khung a, first leg-a an si phurh an sut zo.

Hun pangngaiah goal a luh tawh loh avangin extra time khelh a ni a, extra time-ah Sporting bawk an hlauhawm. Inkhel an ṭan leh chiah tihin Araujo-a'n Bodo defnder pali inkarah tak a pet goal a, Sporting-in hma an hruai.

Hun pek belhah Bodo defender te tihsual nangchingin Rafael Nel-a'n an chak nemnghehna goal a khung a, hun tawp zui nghalin UCL-a Bodo zinkawng a tawp.

Inkhelh banah Bodo/Glimt coach Kjetil Knutsen chuan, "Game-ah rilru kan pe tawk lo a, boruak sang lutuk kha kan zo lo a ni ber mai," a ti a, theihtawp an chhuah tawk loh avangin an chak lo niin a sawi.

Champions League aṭangin tla mah se Bodo/Glimt-in mipui ngainat an hlawh a, an club chanchina UCL vawi khat khelhnaah last 16 an thleng a, an kalkawngah Manchester City, Atletico Madrid leh Inter Milan an hneh theih avangin an record a namai lo hle.