Khatla TBL-in semifinal lut

Mizoram Super League khelh mekah Thawhṭanni zan khan Khatla TBL chuan 74-60 in Chanmari BC an hneh a, semifinal an lut chiang tawh. Inkhel dangah semifinal beisei zinga mi Zemabawk BC chuan 88-80 in Tuikual South BC an hneh bawk.

TBL vs Chanmari

Chanmari lakah an chak lo a nih chuan an dinhmun a derthawng dawn tih an hria a, TBL-in theihtawp chhuahin an khel a, hnehna an chang.

TBL tan an foreigner Makhel Ahkim Mitchell-a'n point 21 neiin a score hnem ber a, Mitchell hian rebound vawi 15 a la bawk.

Mitchell thlawptu zingah Emmanuel VL Awmpuia a che ṭha a, Nursery Veng tlangval hian point 10 score-in assit vawi riat a nei bawk a, player of the match-ah thlan a ni.

Mizo player zingah club captain Vanlalṭhazuala (11) leh Lalhmangaihzuala (10) te TBL chak nan an ṭangkai bawk.

Chanmari BC an khel chhe bik lo a, an ram pawn player JP Walker (13) bakah player pali - Lalrozama, Michael Liansanga, Lalnunsanga leh Mohammad Ishan (10) ten point 10 score tling vek mah se an vanduai zan an tawng a, TBL hneh nan a tawk lo.

Chanmari BC hian match ruk khel tawhin vawi thum an chak a, vawi thum bawk a tlawm zawkah an ṭan avangin semifinal khel lo thei dinhmunah an ding.

Phengphehlep vs Zemaballers

Inkhel hnuhnung zawkah Zemabawk BC chak mah se, Tuikual South BC an zuam sual teuh hle a, a dingchang zawkah an ṭang hlauh.

Zemabawk BC tan Lalropuia'n point 24 neiin a score hnem ber a, inter state player Pratyanshu Tomar-a'n point 23 neiin rebound vawi 16 zet a la bawk. Foreigner Carl James Snyder-a'n point 15 leh rebound 15 neiin a khel ṭha viau bawk.

K. Lalthianghlima'n point 17 a score a, rebound vawi 13 a la bawk. Mission Vengthlang tlangval Thianga hi player of the match-ah thlan a ni.

Tuikual South BC tan foreigner Quentis Davis-a'n point 29 neiin, inkhel zingah a score hnem ber a, Davis hian rebound vawi 12 lain assist pasarih a nei bawk a, triple double a siam teuh hle.

Davis hian a ṭhiante puihna a dawng ṭha tawk lo a, Vanlalhmangaihzuala (16) leh Lalbiakkima (11) te chiahin point 10 an score tling a, Zemabawk BC khelh ṭhat loh zan tawng mah se an hneh zo lo.