Spurs tan beiseina thar

Tottenham Hotspur chuan zanin dar 1:30 hian Champions League last 16 second leg an khel dawn a, Atletico Madrid an mikhual dawn - first leg-ah 5-2 in an tlawm tawh thung!

Spurs hian Atletico an ngam loh hnuah Liverpool chu 1-1 in an inhnehtawkpui a, Igor Tudor-a hnuaia an point hmuh hmasak ber a ni - Anfield-a point an hlawhchhuah theih avangin inrintawkna an neih belh ang.

Hetihrual hian London club tan comeback turin goal thum tal khung a ngai tihna a ni a, a awlsam dawn lo tih a chiang. Liverpool laka khel ṭha em em Richarlison lah hrem vangin a inlan thei dawn lo.

Hei chauh a ni lo. Spurs player zingah Yves Bissouma (tihrawl), Lucas Bergvall (ke rêk), Ben Davies (ke rêk), Mohammed Kudus (malpui), Rodrigo Bentancur (malpui), Dejan Kulusevski (khup), James Maddison (khup) leh Wilson Odobert (khup) te chu hliam vangin an inlan thei dawn lo vek!

Damlohna avangin midfielder Conor Gallagher dinhmun a chiang lo a, Destiny Udogie (malpui), Cristian Romero (lu) leh Joao Palhinha (lu) te pawh he thu buatsaih a nih lai hian an inlan theih dawn leh dawn loh a chiang lo.

Mahse, Spurs tana beiseina siam turin Atletico keeper ṭha mi Jan Oblak chu hliam vangin a inlan thei dawn lo a, Argentine keeper Juan Musso-a'n si ban a nghak ang - Spurs tlarhmain hna a awlsam sawt an beisei dawn a ni.