Barca khelmualah Newcastle leng dawn

Zanin dar 11:15-ah Barcelona chuan Newcastle United an mikhual dawn a, Champions League round of 16 second leg a ni - ṭum dang ang chu ni se, Barcelona an chak ang, tiin sawi lawk ila, tu'n min dem lo ang.

Mahse, thawnthu a danglam tlat - first leg-ah Barca hi harsa loa chak mai tura beisei an nih laiin an chak zo bik lo a, Newcastle khelmualah 1-1 in an inhnehtawk.

Nou Camp-ah chuan a harsa zual ang tih a chiang a, mahse, St James' Park-a Barca chelh theitu Magpies hi an inringtawk khawp ang. Newcastle boss Eddie Howe chuan, "Kan rin a, kan beisei tlat a ngai.

"Kan khelmual nen chuan a inang dawn lo tih a chiang a, mahse, first leg-ah Barca tan harsatna kan thlen thei tih chiang takin kan pholang tawh. Khatiang chiah khan kan tih leh a ngai a ni," a ti a, Barca khelmualah chak theih a beisei.

Team pahnih intawn hmasakah khan Magpies-in vanneih vangin point an hlawh chhuak ringawt lo a, Barcelona zawk an vannei - hun pek belh minute ruknaah Lamine Yamal-a penalty hmangin si phurh an sut hram.

Newcastle an inring tawk a, Barca an draw hnua an match hmasa berah Chelsea chu Stamford Bridge-a lenchilhin, 1-0 in an hneh a, Nou Camp-a an chak theih loh chhan tur an hre lo ang.

Hetihlai hian Barca an hahdam hman bik lo. Pathianni zan khan Sevilla chu 5-2 in an hneh a, Hansi Flick-a tana buaithlak erawh league lamah Real Madrid-in an um ve reng avangin an indahṭha thei lo!

Raphinha chuan hattrick siamin, Dani Olmo leh Joao Cancelo ten goal khat ve ve an khung bawk a, Lamine Yamal pawh bench-ah awm mah se, khelmualah a lut leh tho a, an inkhel chau ve tho - zanin inkhel a hmuhnawm hle tura ngaih a ni.