Raphinha hoin Barca-in Sevilla hneh
La Liga hmahruaitu Barcelona chuan Pathianni zan khan 5-2 in Sevilla an hneh a, hma an hruai chhunzawm zel. Barca tan Raphinha-a'n hattrick a siam a, Dani Olmo leh Joao Cancelo ten goal khat ve ve an khung bawk. Sevilla tan Oso leh Djibril Sow te goal khung chu scoreline timawitu chauh a ni.
Camp Nou-a inkhelah dan pangngaiin mualneituin ball an chang tam zawk a, Catalan club hian an hmelma Real Madrid-in hnehna an chang a, an inhnaih sawt tih an hriat avangin an nawr na nghal a, goal pawh an khung hma.
Minute kuana lekah Sevilla midfielder Sow-a'n Cancelo a tihtluk avangin penalty a chawi a, Raphinha-a'n panenka hmanaga pet goal-in Barca hma a hruaipui.
Cancelo bawkin minute 21-naah penalty a hlawhchhuak leh a, Sevilla right back Jose Angel Carmona a bum hnuah Carmona hian a kutin a khawih palh a, referee-in VAR a rawn hnuah penalty a pe. Raphinha bawk a rawn pen chhuak leh a, goal-a chantir turin harsatna a nei lo a, Barca hmahruaina a belhchhah.
Barca an phur laklawh a, minute 38-naah Marc Bernal-a ball cross satliah chu Olmi-a'n goal kilah tak a pet lut a, 3-0 in Barca-in hma an hruai der. Sevilla defender ten Olmo an veng ṭha tawk lo.
First half hun pek belhah Juanlu Sánchez-a cross chu Oso-a'n tawih takin a pet lut a, an si phurh a sut ṭhen. Barca keeper Joan Garcia-a'n a en liam a, first half-ah 3-1 a ni.
Second half-ah Barca an hlauhawm nghal a, minute 51-naah Raphinha ball pet chu Sevilla defender Nemanja Gudelj-a'n dang pialin keeper a khum a, hattrick a siam. Brazilian forward hian tun season La Liga-ah goal 11 a khungna chiah a ni.
Minute kaw hnu lawkah Cancelo a inlar ve leh a, Portuguese full back hian thui tak a khalh hnuah Sevilla defender te bumin a pet goal a, winger pangngai goal khung atana mawi a ni.
Injury time-ah Sevilla tan Sow-a'n tauh lutin an si phur a sut ṭhen a, mahse hun a tawp zui nghal avangin harsa lutuk loin Barca an chak.
Catalan club hi Real aiin point liin an sang zawk a, match 10 khelh tur a la awm avangin chetsualna chance an la nei thung. Real-in Barca chetsual hun an chang ve reng.